Дунёдаги беқарор вазият Ўзбекистон иқтисодиётига қандай таъсир кўрсатмоқда?

Ташқи иқтисодий вазият мамлакат иқтисодиётига турли каналлар орқали таъсир қилишда давом этмоқда. Бу ҳақда Марказий банк хабар берди.

Жорий йил I чораги охирида таъсирлар кўпроқ салбий баҳоланган бўлса, вазиятнинг сезиларли ўзгариши натижасида II чоракда қисқа муддатли шоклар таъсирлари пасайиб, айрим кўрсаткичларда ижобий тенденциялар намоён бўлмоқда.

Ташқи шокларнинг оқибатлари ташқи пул-кредит шароитлари ўзгариши ҳисобига қарз жалб қилишнинг қимматлашгани ва инфляцион босимлар орқали кўпроқ салбий баҳоланди.

Реал алмашув курсларининг шаклланиши, экспорт тушумлари ва халқаро пул ўтказмалари орқали ички валюта бозорида таклифни қўллаб-қувватловчи омил бўлди.

Шу билан бирга, глобал рецессия эҳтимоллари ва жаҳон молиявий шароитларининг кескинлашиши ўрта муддатли истиқболда Ўзбекистон иқтисодиётига салбий таъсир кўрсатиши мумкин бўлган асосий ташқи хатарлардан ҳисобланади.

Глобал рецессия жараёнлари бошланадиган тақдирда мамлакатнинг асосий савдо ҳамкорларидаги иқтисодий вазият, ялпи ташқи талаб динамикаси ва экспорт товарларимиз нархларига салбий таъсир кўрсатиши мумкин.

Бу эса ўз навбатида, экспорт тушумлари ва бюджет даромадларининг шаклланишига таъсир этади.

Глобал молиявий муҳитнинг янада қатъийлашиши ва геосиёсий вазиятнинг кескинлашуви шароитида инвесторларнинг юқори рискдан қочиши ривожланаётган мамлакатлар миллий валюта курсларининг қадрсизланишига ва қарз олиш қийматининг кескин ошишига олиб келиши мумкин.

Бу ташқи кредит линиялари ва халқаро қарз қимматли қоғозлар чиқариш орқали қарз жалб қилиб инвестицион лойиҳаларни ва бюджети дефицитини молиялаштириш имкониятларини пасайишига олиб келади.

Аввалроқ йил бошидан буён Ўзбекистон иқтисодиёти қандай ривожлангани маълум бўлган эди.