Европа Иттифоқи Украина Миллий банки ҳисобига 500 миллион евро миқдорида ёрдам маблағини юборди. Бу ҳақда Украина бош вазири Денис Шмигал маълум қилди.
«Европа Иттифоқи Украинага 1 миллиард евро миқдорида фавқулодда макромолиявий ёрдам жўнатади. 500 миллион евро миқдоридаги биринчи қисм банк ҳисобига тушди. Иккинчи қисм эртага келишини кутамиз», — деб ёзган бош вазир ўз Telegram каналида.
Унинг сўзларига кўра, 1 миллиард евро Украинага бериладиган, умумий қиймати 9 миллиард евро бўлган катта ёрдам пакетининг бир қисмидир. Ушбу маблағлар бирламчи бюджет эҳтиёжларини молиялаштиришга қаратилади.
12 июль куни Европа Иттифоқининг иқтисодиёт ва молия вазирлари кенгаши мамлакатга фавқулодда макромолиявий ёрдам дастури доирасида Украинага 1 миллиард евро миқдорида кредит ажратишни маъқуллаган.
18 май куни эса Еврокомиссия Украина учун йил охиригача Европа Иттифоқи кафолатлари остида 9 миллиард евро миқдорида фавқулодда макромолиявий кредитлаш дастури тайёрланишини эълон қилганди.
Изоҳ (0)