Ирландия парламенти сенаторлари Малкольм Бирн ва Жон Макхагон (тегишли равишда ҳукмрон коалициянинг «Фианна Фойл» ва «Фине Гэл» партияларидан) мамлакат президенти Майкл Хиггинснинг рафиқаси Сабина Хиггинс Россия-Украина музокараларини қайта тиклашга даъват этилган мактубни эълон қилганидан кейин, президентдан Украинадаги вазият юзасидан ўз фикрини оммага ошкор этишни талаб қилди, деб ёзади «РБК».
Бирннинг фикрича, Хиггинс Россия президенти Владимир Путиннинг шафқатсизлиги юзасидан ўз норозилигини аниқ-равшан билдириши керак. Макгахон, ўз навбатида, мактубни «ноўрин», «бефойда» ва «кўнгилсиз» деб атаб, президентнинг рафиқаси Россия ҳукумати хатти-ҳаракатларини маъқуллаётгани маълум қилди. Унинг фикрича, Хиггинснинг қарашлари «ирландияликларнинг фикрлари билан мутлақо мос келмайди».
Сабина Хиггинснинг мактуби 27 июль куни The Irish Times газетасида чоп этилди, сўнг у Ирландия президенти сайтига ҳам жойланди, аммо кейинроқ матн ўчириб ташланди. Мактубнинг эълон қилиниши кенг жамоатчилик орасида шов-шув келтириб чиқарди, бироқ, ирландиялик сиёсатчилар ичида энг юқори рейтингларга эга бўлган президент Хиггинс ҳалигача вазият юзасидан изоҳ бергани йўқ.
Сабина Хиггинс эълон қилган мактубда гап Украинадаги вазият кескинлашуви бўйича газета мақоласи ҳамда ушбу мамлакатга ёрдам бериш зарурати ҳақида боради. Унда давлат раҳбарининг рафиқаси журналистлар низони тинч йўл билан ҳал қилиш зарурлигига эътибор қаратмагани қайд этиб, музокараларни қайта бошлашга чақирган эди.
«Дунё Россия президенти Владимир Путинни ва Украина президенти Владимир Зеленскийни ярашув ҳақида келишиб олишга ва музокараларни бошлашга кўндира олмас экан, бу муттасил уруш давом этаверади. Қандай қилиб кимдир унда ғолиб бўлиши мумкин?» — деб ёзган Хиггинс.
Россия ва Украина бир неча марта юзма-юз тинч музокаралар ўтказганидан кейин, улар онлайн-форматга кўчди. Баҳорда музокаралар жараёни тўхтатиб қўйилди, Москва Киевни тартибга солиш жараёнини музлатиб қўйишда айбламоқда. Россия ҳукумати, шунингдек, учрашувларнинг қайта тикланишига Ғарб тўсқинлик қиляпти, деган фикрда.
Киев, ўз навбатида, Россия билан музокаралар Украина жанг майдонида ғолиб бўлганидан кейингина амалга ошиши мумкинлигини даъво қилмоқда. Хусусан, бу ҳақда ташқи ишлар вазири Дмитрий Кулеба айтиб ўтганди. Украина қўлдан бой берилган ҳудудларни қайтариб олиб, мамлакат шарқи ва жанубида суверенитетни тўлиқ тикламоқчи, «якуний музокараларга оид позициямиз» шунақа, деган эди у.
Изоҳ (0)