Оммавий норозиликлар фонида Ироқ пойтахти Бағдодга қўшинлар киритилди, деб ёзади «РБК».
Бош вазир Мустафо ал-Козимий матбуот хизмати маълум қилишича, ҳарбийлар намойишчиларга қарши жанговар ва резина ўқлар ҳамда тутун шашкаларини қўлламайди.
«Армия Ироқ халқига хизмат қилади. Хавфсизлик кучлари мажбуриятлари намойишчиларни ҳимоя қилиш, жамоатчилик ва хусусий мулкни асраш, ҳар қандай қонунбузарликлар олдини олиб, вазиятни беқарорлаштиришга уринаётган ёвуз ниятлиларни аниқлашдан иборат», — дея баёнот берди Ироқ Мудофаа вазирлиги.
Ироқ хавфсизлик хизмати қўшимча қилишича, хавфсизлик кучлари ва ҳарбийлар «ҳар қандай шароитларда» ўзларининг мамлакатга содиқлигини исботлаган ва «сиёсий масалаларга аралашмаяпти».
Бағдодда норозилик намойишлари июль охирида бошланди. Бу ўтган йил октябрида, Ироқда сайловлар ўтказилганидан бери энг катта кўламли акциядир. Ўшанда шиалар етакчиси Муктада ас-Садр раҳбарлик қилувчи «Садрчилар ҳаракати» нисбатан кўпчилик овозни йиғган, аммо ҳокимият тепасига кела олмаган эди: янги ҳукумат шакллантириш ҳақидаги музокаралар томонлар, биринчи навбатда, шиалар ва курд гуруҳларининг муросасизлиги туфайли боши берк кўчага кириб қолди.
30 июль куни намойишчилар парламент биносини эгаллаб олди ва ўтирган ҳолда иш ташлаш эълон қилди. Улар бош вазир лавозимига ас-Садрнинг рақиби — Муҳаммад ас-Суданий номзоди илгари сурилишига қарши чиқмоқда. У «Координация тузилмаси» блоки вакили бўлиб, шиалар партияларининг ушбу альянсини ва ас-Суданийнинг ўзини ҳам намойишчилар қўшни Эроннинг гумашталари деб ҳисоблайди.
Изоҳ (0)