Исроил бош вазири Яир Лапид БМТ бош котиби Антониу Гутерришга мактуб юбориб, ташкилотнинг Ғазо секторида Исроил ва Фаластиннинг ҲАМАС ташкилоти ўртасидаги зиддиятни текшириш бўйича комиссиясини унинг аъзоларидан бирига тегишли «антисемитизмга оид фикрлар» туфайли тарқатиб юборишни талаб қилди, деб ёзади «РБК» Исроил ҳукуматига таяниб.
«Жаноби олийлари, бугун мен сизни вазиятни тузатиш учун ушбу йўл қўйиб бўлмайдиган масалада ўз сўзингизда туришингизни сўрайман… ОАВларни ‘назорат қилиш’ учун амал қилувчи ‘яҳудий лоббиси’га туҳмат замонавий тарихнинг энг қоронғи кунлари ҳақида эслатади. Антисемитизмга қарши курашни фақат гап билан олиб бориш мумкин эмас, бунинг учун ҳаракатлар ҳам керак. Ҳаракат қилиш, комиссияни тарқатиб юбориш вақти келди», — деб ёзди бош вазир.
Лапид комиссиянинг баъзи аъзолари, хусусан, Милун Котари омма олдида билдирган антисемитизм руҳидаги фикрларга эътибор қаратди. У антисионистик Mondoweiss блогига берган интервьюсида Исроил БМТ ишига путур етказаётгани, «яҳудийча лобби» эса ижтимоий тармоқларни назорат қилишга уринаётганини маълум қилганди.
Исроил бош вазири фикрича, комиссия «антисемитизмни нафақат қўллаб-қувватлаяпти, балки рағбатлантиряпти ҳам».
Комиссия текширув олиб бораётган зиддият ўтган йил майида бошланиб, 11 кун давом этганди. Вазият кескинлашувига Қуддусда араб оилаларининг кўчириб юборилиши туфайли юзага келган норозилик намойишлари сабаб бўлди, шундан кейин томонлар бир-бирига ракеталар улоқтира бошлади.
Ғазо секторидан Исроил ҳудудига қарата қарийб 3,5 мингта ракета учирилди, оқибатда 12 фуқаро ҳалок бўлди. Исроил мудофаа армияси (ЦАХАЛ) бунга жавобан Ғазо секторига ҳужум қилди, 232 фаластинлик ҳалок бўлди. ЦАХАЛ ҳалок бўлган Ғазо тинч аҳолисининг баъзилари Исроилгача бориб етмаган ўз ракеталари орқали ўлдирилганини даъво қилди. Низо ўша йили 21 май куни, ўт очишни тўхтатиш режими кучга кирганидан кейин якунланди.
Ғазога ҳужумларни тўхтатишни ёқлаб ўшанда Исроил хавфсизлик маҳкамаси овоз берганди. ҲАМАСнинг ислом дунёси билан алоқалар бўйича идораси аъзоси Али Барака ўшанда Исроил бош вазири Биньямин Нетаньяху низода мағлубиятга учраб, Фаластин халқи эса ғолиб бўлди, деб ҳисоблаган эди.
Изоҳ (0)