Ўзбекистон ҳужумчи Элдор Шомуродов «Рома»нинг Исроилдаги йиғинига олиб кетилмади ва римликлар сафини тарк этишга яқин турибди. Бу ҳақда футболчининг агенти Қаҳҳор Мўминов маълум қилди.
«Рома» мавсумолди йиғини доирасида 28 июль куни Исроилга йўл олди ва у ерда «Тоттенҳэм»га қарши назорат баҳсида иштирок этади. Мазкур йиғинга римликларнинг беш нафар футболчиси жалб этилмаган, улар орасида Шомуродов ҳам бор. Карлес Перес ва Жордан Верету жароҳат боис Тель-Авив сафарини ўтказиб юборса, Элдор Шомуродов, Кристиан Волпато ҳамда Филиппо Триппи мураббийлар штабининг қарори туфайли Римда қолган.
«Championat.asia» вазиятга ойдинлик киритиш учун ўзбекистонлик футболчининг агенти билан боғланди. Қаҳҳор Мўминов мижози яқин орада жамоани тарк этиши ва шу боис Исроилга бормаганини маълум қилган.
Шомуродов 2021 йилнинг ёзги трансфер ойнасида 18 миллион евро эвазига «Женоа»дан «Рома»га ўтганди. У «бўрилар»сафида жами 40 та ўйин ўтказиб, бешта гол ва олтита голли узатма амалга оширди.
Изоҳ (0)