Шоу-бизнес вакиллари орасида ўзбек миллатига мансуб бўлса-да, бу тилда гапиришни истамайдиган ижодкорлар жуда кўп. Албатта, уларни оқлаб бўлмайди. Чунки тилни билмай қўшиқ куйлаш талаффузнинг нотўғри қўлланишига ва маъносиз қўшиқларнинг яратилишига ҳам сабаб бўлади. Аммо ижодкорлар орасида ўзга миллат вакили бўлса-да, соф ўзбек тилида гапиришга интиладиганлар жуда кўп. Улар нима учун ўзбек тилини ўрганишга аҳд қилишгани ҳақида қуйида сўзлаб беради.
Милена Мадмусаева: «Мактабга чиққунга қадар ўзбекчани билмаганман»
— Онам эрон, отам эса тожик миллатига мансуб. Уйимизда асосан форсий тилда гаплашилади. Ота-онам жамиятга мослашиб кетишда қийналмаслигим учун мени рус боғчага берган. Шундан кейин бироз рус тилини ўрганганман. Ота-онам «Ўзбекистонда яшаяпмизми, демак Милена шу тилни билиши керак», деб ўзбек мактабига ўқишга берган. Аввалига бу тилни ўрганишга қийналганман, аммо вақт ўтиб ҳаммаси изига тушиб кетган, — дейди Милена Мадмусаева.
Нигина Анорбоева: «Қўшни болалар сабаб турли тилларни ўргандим»
— Оиламиз аралаш миллатдан ташкил топган. Дадам ўзбек, онам эса қозоқ миллатига мансуб. Маҳалламизда турли миллат вакиллари истиқомат қилишарди. Қўшни болалар сабаб турли миллат тилларидан оз-оздан ўрганганман, — дейди актриса Нигина Анорбоева.
Камила Гимандинова: «Онам украиналик, отам эса рус»
— Отам рус, онам эса украин миллатига мансуб бўлган. Аммо онам бир ёшимда мени отамга ташлаб ўзи кетиб қолган. Уни фақат биргина расми орқали кўрганман. Ўзбек тилида деярли билмасдим. «Қадам» сериалидан кейин бу тилни янада яхшироқ билишим кераклигини англадим. Баъзи сўзларнинг ҳалигача тушунмайман, аммо ўрганишга ва бу тилда хатосиз гапиришга ҳаракат қиламан, — дейди актриса ва блогер Камила Гимандинова.
Анжела Есимбетова: «Мен ўзбек бўлиб туғилишим керак эди»
— Қорақалпоқ оиласида дунёга келганман. Ўн биринчи синфга қадар қорақалпоқ мактабида ўқиганман. Мактабимизда фақат ҳафтада бир соат ўзбек тили ва рус тили дарслари бўларди. Ўқитувчиларнинг камлиги ёки бошқа сабаблар билан ўзбек тили дарслари ҳар доим ҳам бўлавермасди. Аммо мен ўзбек тилидаги китобларни кўп ўқирдим. «Ўзи мен ўзбек бўлиб туғилишим керак эди», дердим. Тошкентга келган пайтимда бу тилда гаплашишга бироз қийналганман, аммо вақт ўтган сари ўз она тилимдек бўлиб кетган, — дейди актриса ва режиссёр Анжела Есимбетова.
Татяна Шарқ: «Ўзбек тили ижодимга ҳам ҳаётимга фақат ижобий таъсир этган»
— Рус оиласида туғилганман. Институтда ўқиб юрган пайтимда ҳам деярли ўзбек тилини билмаганман. Тошкент ирригация ва қишлоқ хўжалигини механизациялаш муҳандислари институтида ўқиётган вақтим жуда кўп концертларда иштирок этардим. Ўшанда менга ўзбек тилини ўрганишга хоҳиш туғилган. Ўзбек тилидаги қўшиқларни ижро этишдан аввал сўзларни ёдлардим ва маъносини билишга ҳаракат қилардим. Бу тилни ўрганишим ижодимга ҳам ҳаётимга фақат ижобий таъсир этган, — дейди «Шарқ» гуруҳи хонандаси Татяна Зайцэва.
Осман Наврўзов: «Она тилим эмас, ўзбек тили муваффақият келтирди»
— Асли миллатим туркман, аммо қорақалпоқ элида таваллуд топганман. Туркман мактабида ўқиганим учун қорақалпоқ тилини у қадар яхши билмайман. Яъни тушунаман, аммо гапиришга қийналаман. Аммо ўзбек тили анча яхши биламан. Бунга сабаб туркман тилида куйлаган қўшиқларим унчалик муваффақиятли чиқмаган. Ўзбек тилидаги «Любимая» қўшиғи хонанда бўлиб танилишимга улкан ҳисса қўшган. Шу боис, ўзбек тилин янада яхши ўрганимга ҳаракат қиламан, — дейди хонанда Осман Наврўзов.
Зуҳра Солиева: «Миллатим — эроний»
— Миллатим ўзбек эмас, эроний. Бобом анча йиллар аввал Самарқандга кўчиб келган, аммо фарзандлари шу диёрда дунёга келган. Оиламизнинг барча вакиллари ўзбек ва тожик тилларини яхши билишади, — дейди актриса Зуҳра Солиева.
Ареват Григорян: «Тил ўрганиш учун ўша миллатни севиш керак»
— Отам арман миллатига мансуб ва онам рус. 11 ёшимда отам вафот этгач, онам мен ва икки акамни ёлғиз улғайтирган. Мен айнан Тошкентда туғилганим учун ўзбек халқини жудаям яхши кўраман. Ота-онам ҳам шу юрт вакилларини яхши кўришгани сабабли оилавий муҳитимиз ҳам ўзбекона бўлган. Шунинг учун мени ўзбек боғчасига юборишган. Шундан сўнг ўзбек мактабида таълим олдим. Шу миллатга севгим ва муҳаббатим туфайли ўзбек тилини яхши билсам керак. Менинг фикримча одам ўзга тилни мукаммал ўрганиши учун, ўша миллатни севиши керак, — дейди сухандон Ареват Григорян.
Мавзуга доир:
- Юлдуз Усмонова, Шаҳзода, Улуғбек Раҳматуллаев ва чет эл хонандалари билан дуэт куйлаган бошқа ўзбек санъаткорлари (видео)
- Совиткич, машина ва уй. Ўзбек шоу-бизнеси вакилларининг илк даромадидан қилган қимматбаҳо харидлари (видео)
- 500 квадрат метрли гардероб, иситиш тизимига эга гараж, мини ҳайвонот боғи: Ўзбекистонлик санъаткорлар қандай уйларда яшайди? (фото, видео)
Изоҳ (0)