Шоу-бизнес вакилларини гўзал ташқи кўринишда кўришга ўрганиб қолганмиз. Улар соч турмаги, пардози ва либослари билан бошқалардан ажралиб туриши керак. «Дарё» мухбири Наргизахон Муродова санъаткорлар билан доимий ҳамкорлик қиладиган машҳур тўрт стилист билан суҳбатда бўлди. Афсуски, уларнинг ҳаммаси ҳам хизмат ҳаққини оммага ошкор этишни истамади.
Ирода Рустамова: «Санъаткорлар билан сан-манга бормаганман»
Instagram’да Ироша номи билан машҳур стилист ҳисобланади. У 1987 йили таваллуд топган бўлиб, Москвадаги Гоар Авициан, Сочидаги Георгий Кот, Бакуда Гунай Жабраилова ва Афақ хонум мактабларида таҳсил олган.
— Санъаткорлардан илк мижозим Раъно Ярашева бўлган. Жуда ҳаяжонланганман. Шукрки, бугунги кунда доимий мижозларим орасида шоу-бизнес вакиллари жуда кўп. Уларнинг имижини яратаётганда, кўпроқ уларнинг истакларига қулоқ тутаман. Чунки санъаткор мижозларимнинг деярли барчаси оилали ва имиж ташлашда турмуш ўртоқларига қулоқ солишади. Кейин клип, концерт ва тўй-хизматлари учун қилинган имижлар бир-биридан фарқ қилади.
Азамат Зайниддинов: «Имижни 150 минг сўмга баҳолайдиган машҳурлар ҳам бор»
Ўзбекистондаги энг машҳур стилистлардан бири ҳисобланади. У Хитой халқ республикасидаги «Asian beauty academy»да таҳсил олган. Унинг илк мижози хонанда ва айни кунда машҳур тадбиркор Нора Зайниддинова бўлган.
— Бирхилликни ёқтирмайман. Ҳар бир мижозимга креатив ёндашишга, ўзига хос имиж яратишга ҳаракат қиламан. Мижозларим орасида шоу-бизнес вакиллари жуда кўп. Масалан, Озода Нурсаидова, Феруза Жуманиёзова, Севинч Мўминова, Зарина Низомиддинова ва бошқалар.
Ўз ишимни севишимни ва шунга яраша ҳақ талаб қилишимни билишади. Аммо шоу-бизнес вакиллари орасида яратилган имиж учун 150 минг сўм пулни ташлаб кетадиганлар ҳам йўқ эмас. Ёки «Сизни Instagram’да реклама қилиб қўяман», деб нархни туширишга ҳам уринадиганлар бор. Гап фақат рекламада эмас, стилистнинг ҳам ўзига яраша харажатлари бор. Афсуски, буни тушунишмаётгани алам қилади. Меҳнатимни қадрлайдиган санъаткор — Феруза Жуманиёзова, — дейди маҳоратли стилист Азамат Зайниддинов.
Азамат Зайниддинов Ўзбекистондаги энг қиммат стилистлардан бири. У оқшом образини 2 000 000 сўм ҳақ эвазига яратади.
Шоҳруҳ Мусаев: «Илк мижозим Асал Шодиева бўлган»
Instagram’да Шаха номи билан машҳур бўлган стилист ҳисобланади. У 1992 йил Тошкент шаҳрида туғилган. Биринчи мутахассислиги бўйича мебель жиҳозлаш дизайнери ҳисобланади. Сўнг Бекзод Саидовга шогирдликка тушиб, стилистлик соҳасини ўрганган.
— Георгий Кот ва Татяна Белойнинг халқаро гўзаллик мактабларида таҳсил олганман. Санъаткорлардан илк мижозим актриса Асал Шодиева бўлган. У билан ҳалигача бирга ишлаймиз. Санъаткорларнинг имижини яратишда бошқаларга ўхшаб қолмаслигига аҳамият бераман. Улар билан тортишмасликка ҳаракат қиламан. Аммо барибир икки ижодкор ўртасида тортишувлар бўлиб туради.
Доимий мижозларим Ҳалимахоним, Асал Шодиева, Нилуфар Сотволдиева, Шоира Отабекова, Нигора Каримбоевалар ҳисобланишади.
Лейла Хўжа: «Райҳонга содиқман, бошқа санъаткорлар билан ишламайман»
Бу стилист хонанда Райҳон Ғаниевага ҳамиша содиқ. Шу кунгача Райҳондан бошқа бирорта санъаткор билан ижодий ҳамкорлик қилмаган. Бунинг сабабини Лейла қуйидагича изоҳлайди.
— Илк марта Райҳон Ғаниеванинг ташқи кўриниши устида ишлаганимда анча ёш эдим. У билан тезда тил топишиб кетганмиз. Нега бошқа хонандалар билан ишламаслигимга кўпчилик қизиқади. Назаримда, санъаткор учун бошқаларга ўхшамайдиган образ яратиш керак. Стилистнинг санъаткор мижозлари кўп бўлса, улар бир-бирига ўхшаш бўлиб қолиши мумкин.
Клипга имиж яратиш учун Райҳон иккимиз узоқ вақт бош қотирамиз. Аввал уни эшитаман, кейин фикрларимни айтаман. Клип тарихда қолади, 5-6 йилдан кейин уни кўрганда одамлар кўзига имиж ғалати, беўхшов кўринмаслиги керак. Одамда клип имижлари учун тренддаги услублардан фойдаланмайман. Чунки улар жуда тез эскиради ва ундан бир вақтнинг ўзида кўпчилик фойдаланади.
Кўпчилик хонандалар ҳамкорлик қилишни таклиф қилишган. Уларга тўғри тушунтирган ҳолда рад жавобини бераман. Аммо шоу-бизнесга алоқадор бўлмаган қиз-аёлларнинг имижи устида ишлашга ҳамиша тайёрман. Райҳон билан молиявий масалада тортишмаймиз. У ҳамиша рози қилади. Қизларнинг имижини эса 500 000-1 500 000 гача нархда яратиб бераман, — дейди Лейла Хўжа.
Мавзуга доир:
- Гўзаллик маъбудаси: Моника Беллуччининг тарихга кирган 15 та энг ёрқин образи (фото)
- Рассом вақтнинг жуда тез ўтаётганини кўрсатиш учун машҳурларнинг ҳозирги суратини ёшлигидаги кўриниши билан ёнма-ён акс эттирди (фото)
- Ҳайратда қолишингиз кафолатланган: бутунлай бошқа қиёфага кирган гримдаги юлдузлар (фото)
Изоҳ (0)