Туркия ёнилғи соҳасида келишув ишлаб чиқмоқда, у Украина донини экспорт қилиш бўйича 22 июль куни имзоланган шартномага ўхшаш бўлади. Бу ҳақда мамлакат мудофаа вазири Ҳулусий Акар Al Jazeera телеканалига берган интервьюсида айтиб ўтди.
Унинг сўзларига кўра, муҳокама қилинаётган келишув глобал энергетика инқирозини ҳал қилишга ҳисса қўшади, бироқ тайёрланаётган ҳужжатга оид бошқа тафсилотлар ҳозирча маълум қилинмаган.
Шу билан биргаликда, Туркия мудофаа вазирлиги раҳбари ўз мамлакати Украина портларидан ғаллани хавфсиз ташиш режаси устида ишлаётганини таъкидлади. Ҳулусий Акар қурол контрабандаси ва провокацияларни олдини олиш мақсадида озиқ-овқат олиб чиқиладиган кемалар Россия, Туркия, Украина ва БМТ вакиллари томонидан текширилишини тасдиқлади.
22 июль куни Истанбулда жаҳон бозорларига озиқ-овқат ва ўғит етказиб бериш муаммосини ҳал этиш бўйича ҳужжатлар тўплами имзоланган эди. Россия ва БМТ ўртасидаги меморандумга кўра, жаҳон ташкилоти қишлоқ хўжалиги маҳсулотлари ва ўғит экспортига тўсқинлик қилувчи Россияга қарши чекловларни олиб ташлаш бўйича ишларда иштирок этмоқда. Бундан ташқари Украина томонидан назорат қилинадиган Қора денгиз портларидаги донни экспорт қилиш механизмини белгилаш ҳақидаги яна бир ҳужжат мавжуд.
Мавзуга доир: Украина, Туркия ва БМТ ўртасида дон экспорти бўйича келишув имзоланди
Изоҳ (0)