Олимлар Тинч океани тубида ўнлаб янги турларни кашф қилди — уларнинг аксарияти денгиз бодринглари (фото)

Олимлар Тинч океанининг тубида ўнлаб янги турлар, асосан денгиз бодрингларини кашф қилди. Тадқиқотчилар, шунингдек, кўпоёқ, медуза ва ҳар хил турдаги маржонларнинг қариндошларини топди.

Буюк Британиядаги Табиий тарих музейи тадқиқотчилари биринчи марта масофадан бошқариладиган транспорт воситаси ёрдамида Тинч океанининг марказий қисмидан намуналар йиғди – топилган 55 та намунадан 48 таси ҳар хил турларга тегишли. Илгари бу ҳудуддаги мавжудотлар фақат фотосуратлар асосида ўрганилар эди.

Топилган жонзотлар орасида, хусусан, сегментланган чувалчанглар, кўпоёқлилар оиласига кирувчи умуртқасизлар, медузалар оиласига яқин денгиз ҳайвонлари ва турли хил маржонлар бор. 36 та намуна 4,8 минг метрдан ортиқ чуқурликдан, иккитаси 4,1 минг метр чуқурликдаги сувости тоғининг ёнбағридан, 17 таси эса 3—3,5 минг метр чуқурликдан топилган.

Ушбу тадқиқот нафақат потенциал янги турларнинг кашф этилгани, балки ушбу мегафауна намуналари илгари фақат денгиз туби тасвирларидан ўрганилгани сабабли ҳам муҳимдир. Намуналар ва улардаги ДНК маълумотларисиз биз ҳайвонларни тўғри идентификациялай олмаймиз ва қанча тур мавжудлигини тушуна олмаймиз», — деди тадқиқотнинг етакчи муаллифи доктор Гуадалупе Брибеска-Контрерас.