Қирғизистонда COVID-19 га қарши жамоавий иммунитет шаклланган, деди республика соғлиқни сақлаш вазири вазифасини бажарувчи Жаркинбек Қосимбеков брифингда.
«COVID-19 билан яшашга кўникишимиз зарур, ҳозирга келиб мамлакатда жамоавий иммунитет шаклланган. Шифокорлар вирусни қандай даволашни ўрганди, муолажа учун маблағ ва дори-дармонлар етарли», — деди у.
«Агар зарурат туғилса, биз, дейлик, Қозоғистон каби қисман чекловларга ўтамиз. Аммо ҳозирда эпидемиологик вазият бўйича алоҳида ташвишга ўрин йўқ», — дея қўшимча қилди расмий.
Қосимбековнинг сўзларига кўра, Қирғизистонда «жами 6,1 миллион доза вакцина харид қилинган, шундан 3,5 миллион дозаси ишлатилган, 267 минг дозаси ҳисобдан чиқарилган, COVAX дастури доирасида яқин кунларда Pfizer вакцинасининг яна 100 минг дозаси етказиб берилиши кутилмоқда».
Таъкидланишича, Қирғизистоннинг 1,5 миллион фуқароси COVID-вакциналарнинг бир дозаси билан, 1,3 миллион киши икки дозаси билан эмланган. COVAX дастури доирасида республикага 1,4 миллион дозадан ортиқ дори воситалари етказиб берилган, 2,4 миллион доза республика бюджети ҳисобидан харид қилинган, қарийб 2,3 миллион доза инсонпарварлик ёрдами сифатида келтирилган.
Қирғизистонда коронавирусга қарши оммавий эмлаш 2021 йилнинг 11 июлидан бошланган эди. Мамлакатда «Спутник V», «Спутник Лайт», Pfizer, Sinopharm, SinoVac, AstraZeneca, QazVac каби вакциналар билан эмланиш мумкин.
Изоҳ (0)