Бирлашган Миллатлар Ташкилоти (БМТ) «Толибон»ни Афғонистонда ҳокимият тепасига келганидан сўнг юзлаб инсон ҳуқуқлари бузилишига йўл қўйганликда айблади. Бу ҳақда Deutsche Welle хабар бермоқда.
БМТ Афғонистонга ёрдам кўрсатиш миссиясининг янги ҳисоботида айтилишича, мамлакат бўйлаб умумий хавфсизлик яхшиланган, аммо бунинг эвазига тинч аҳолига нисбатан қийноқлар ва ҳаётига таҳдидлар юзага келмоқда.
БМТнинг Афғонистонга ёрдам миссияси амалдаги ҳукумат аъзолари, афтидан, инсон ҳуқуқларини поймол этиб, жазосиз қолаётганидан хавотирда, — дейилади ҳисоботда.Ҳисоботда айтилишича, 2021 йилнинг августидан, яъни «Толибон» Афғонистон пойтахти Кобулни эгаллаб олганидан бери 700 киши ҳалок бўлган, 1400 киши яраланган. Бу қурбонликларнинг аксарияти мамлакатдаги ИШИД террор ташкилоти томонидан уюштирилган ҳужумлар билан боғлиқ.
Шу билан биргаликда, БМТнинг Афғонистонга ёрдам миссияси 160 та судсиз қатл, 56 та қийноқ ва шафқатсизлик ҳолатлари ҳамда 170 дан ортиқ собиқ ҳукумат амалдорлари ва хавфсизлик кучлари ходимларининг асоссиз ҳибсга олинишини ҳужжатлаштирган.
Шунингдек, БМТнинг Афғонистонга ёрдам миссияси аёллар ва қизларга нисбатан зўравонлик, қотиллик, зўрлашлар, ўз жонига қасд қилишлар, мажбурий никоҳлар, вояга етмаганлар никоҳи, тажовуз ва калтаклашлар, такрорий номусга тегиш сингари ҳолатлар ҳақида 87 та хабарни олган.
Бизнинг кузатувимиз шуни кўрсатадики, 15 августдан бери хавфсизлик билан боғлиқ вазият яхшиланганига қарамай, Афғонистон халқи, айниқса, аёллар ва қизлар инсон ҳуқуқларидан тўлиқ фойдаланиш имкониятидан маҳрум, — деди Афғонистон бош котибининг махсус вакил ўринбосари Маркус Потсел.БМТнинг Афғонистондаги инсон ҳуқуқлари бўйича миссияси раҳбари Фиона Фрэйзер у ерда «жазосизлик ҳукмрон»лигини айтди ва даъволар ҳақида ҳисоботлар кам бўлиши мумкинлигидан огоҳлантирди. Инсон ҳуқуқлари бузилиши 173 журналист ва оммавий ахборот воситалари ходимларига ҳам таъсир кўрсатди. Улардан 163 нафарининг ҳуқуқлари «Толибон» расмийлари томонидан бузилган.
Бироқ «Толибон» вакиллари ҳисобот хулосаларини рад этиб, уларни асоссиз деб атади.
«Ўзбошимчалик билан ҳибсга олишлар ва судсиз қатлларга йўл қўйиб бўлмайди. Бундай қонунбузарликларда айбдор деб топилган ҳар бир киши жиноятчи ҳисобланади ва унга шариат ёки Ислом қонунлари асосида иш кўрилади», — деб ёзди Толибон ҳукумати сўзловчиси Забиҳуллоҳ Мужоҳид ўз Twitter саҳифасида.
Аввалроқ БМТ «Толибон»ни аёлларга қўйилган тақиқни бекор қилишга чақирган эди.
Мавзуга доир: «Толибон» қизларнинг таълим олишига қўйилган тақиқни бекор қилмоқчи
Изоҳ (0)