Kyodo маҳаллий ахборот агентлигининг хабар беришича, Япония ҳукумати 8 июль куни суиқасд оқибатида вафот этган собиқ бош вазир Синдзо Абэнинг давлат дафн маросимини ўтказиш санасини 27 сентябрга белгилади.
Дафн маросими Токиодаги «Будокан» аренаси ва Китаномару боғида бўлиб ўтади.
Абега ҳужум Нара шаҳрида содир этилган — у ўзи бошқарган Либерал-демократик партияни қўллаб-қувватлаб нутқ сўзлаётган эди. Сиёсатчига суиқасдни маҳаллий фуқаро Тецуя Ямагами амалга оширган. У Синдзо Абэга икки марта ўқ узган, собиқ бош вазир бўйнидан ҳамда юрагидан яраланган. Шундан сўнг сиёсатчи касалхонага олиб кетилди, аммо шифокорлар уни қутқара олмади, ҳужумдан бир неча соат ўтиб Абе касалхонада вафот этган.
Абе 12 июль куни дафн этилди. Японияликларнинг собиқ бош вазир билан видолашишига имкон яратиш учун маросим Токио кўчалари бўйлаб ўтказилган. Сўнг унинг жасади куйдирилган.
Япония ҳукуматини энг узоқ вақт (2006 йилдан 2007 йилгача ва 2012 йилдан 2020 йилгача) бошқарган сиёсатчи ўлимидан сўнг мамлакатнинг энг фахрий мукофоти — Хризантема олий ордени билан тақдирланиши хабар қилинган.
Мавзуга доир: Синдзо Абэнинг ҳалокатли суиқасдидаги ҳал қилувчи асосий 2,5 сония (видео)
Изоҳ (0)