Россия ҳукумати Греция, Дания, Словения, Хорватия ва Словакияни Россия ҳамда рус компаниялари ва фуқароларига нисбатан «дўст бўлмаган ҳаракатларни» амалга ошираётган давлатлар рўйхатига киритди. Тегишли буйруқни Россия ҳукумати раҳбари Михаил Мишустин имзолади, дейилади Вазирлар Маҳкамаси сайтида.
Ҳукумат хабарида қайд этилишича, ушбу мамлакатларнинг Россиядаги дипломатик ваколатхоналарида ходимлар сонига чеклов қўйилган. Хусусан, Греция дипломатик ваколатхоналарига 34 нафардан, Дания 20 нафардан, Словакия 16 нафардан кўп бўлмаган кишини ёллаши мумкин бўлади.
«Словения ва Хорватия ўз дипломатик ваколатхоналари ва консуллик идораларида ходимларни ёллай олмайди», — дейилади ҳукумат матбуот хизмати хабарида.
2022 йил март ойида, Украина билан уруш бошланганидан бир неча кун ўтиб, Россия ҳукумати президент топшириғига кўра «дўст бўлмаган давлатлар» рўйхатини тузди. Рўйхатга Европа Иттифоқининг барча давлатлари, АҚШ, Буюк Британия, Япония ва 20 га яқин бошқа давлатлар киритилган.
Март ойида Россия президенти Владимир Путин «дўст бўлмаган» давлатлар Россия гази учун тўловни рублда амалга ошириши ҳақида фармон чиқарган.
Изоҳ (0)