Ўзбек санъатидаги бўйдоқлар нега оила қуришга шошилишмаётгани, орзусидаги рафиқа қандай бўлиши ва тўйларига нималар «халал» бераётгани ҳақида билишни истайсизми? Марҳамат, қуйидаги саволларга улардан қисқача жавоб олинг.
Дилшодбек Каттабеков — 31 ёшда
Болалигидаёқ «Кичкина табиб» фильмидаги роли билан томошабинлар меҳрини қозонган Дилшодбек Каттабеков ҳам анча улғайиб қолди. У ёшини сир туца-да, 30 ёшни қаршилагани аниқ. Афсуски, бу ижодкор ҳалигача бўйдоқлар сафини тарк этгани йўқ. У 2018 йилдаги интервьюларида уйланиш учун яхши қиз излаётганини маълум қилганди.
— Насиб қилган инсон билан оила қураман. Кўпчилик қизлар ёки уларнинг ота-оналари санъаткорлар ҳақида нотўғри фикрда. Санъаткор ҳам оддий инсон, у тўй хизмати ёки зиёфатларга касби юзасидан боришини тўғри тушунишмайди. Ёки баъзи қизлар санъатни тушунишмагани учун рад жавобини беришяпти. Улардан ранжиганим йўқ, пешанага ёзгани бўлади, — дейди Дилшодбек Каттабеков.
Ёрқинхўжа Умаров – 29 ёшда
«Жана-жана» қўшиғи билан халқимиз кўнглидан жой олган хонанда Ёрқинхўжа Умаров ҳам ҳали бўйдоқлар сафини тарк этгани йўқ. Унинг хонанда Афрўза билан илиқ муносабатда эканлиги ҳақида хабарлар тарқалганди. Аммо тўйдан негадир дарак йўқ.
— Оиламиздаги ёлғиз эркак, ота ўрнидаги масъул шахсман. Яқиндагина синглимни узатдик. Ундан аввал уйланишни истамадим. Насиб қилса, энди онамга яхши ҳамсуҳбат бўладиган, хизматларини қилиб, дуосини оладиган қизга уйланаман, — дейди хонанда Ёрқинхўжа Умаров.
Амирхон Умаров — 27 ёшда
«Очиқчасига гаплашамиз» шоуси орқали томошабинларга яхши таниш бўлган телебошловчи Амирхон Умаров ҳам айни оила қурадиган ёшда. Афсуски, ўзига муносиб қизни тополмаётгани туфайли ҳали ҳам бўйдоқлар сафини тарк этолмаяпти. Бир пайтлар у ҳамкасби Мадина Ниғматуллаевага уйланиши ҳақида миш-мишлар тарқалганди. Аммо Мадина актёр йигит билан оила қурди. Шу кунларда эса Амирхон Умаров бошқа ҳамкасби Ҳуснора Шодиева билан илиқ муносабатда экани ҳақидаги миш-мишлар тарқалди.
— Насиб қилса, тўй бўлади, ҳаракатдамиз. Ҳамкасбларим билан ўртамиздаги муносабат ҳақида тарқалаётган гап-сўзлар шунчаки миш-миш. Ҳуснора Шодиева ҳамкасбим, — дейди Амирхон Умаров.
Шоҳрух Ҳамдамов — 27 ёшда
Актёр Шоҳрух Ҳамдамов хонанда Муниса Ризаеванинг «Овуна» клипида суратга тушганидан кейин улар оила қуриши ҳақида миш-мишлар тарқалганди. Орадан 4 йил вақт ўтди ҳамки, тўйдан дарак йўқ.
— Бу клипдан кейин «Мунисага уйланасизми? Чиройли жуфтлик бўлибсизлар» деган гапларни кўп эшитдим. Аммо бу ижод, реал ҳаёт эмас. Муниса билан дўстмиз, ҳаттоки унга уйланиш фикри хаёлимда ҳам бўлмаган. Холаларим мени уйлантиришга анчадан бери ҳаракат қилишади. Ҳар доим «Озгина карьера қилишим керак», деб режаларини ўзгартираман, — дейди актёр Шоҳрух Ҳамдамов.
Шаҳзод Султонов — 26 ёшда
Актёр Шаҳзод Султонов ва Феруза Норматова ўртасидаги муносабат кўплаб миш-мишларга сабаб бўлган. Аммо тўйдан дарак йўқ, энг қизиғи, партнёрлар бир-бири билан оила қуриш ниятида эмас.
— Феруза билан партнёрмиз, холос. Биз ҳақимиздаги тарқалаётган гаплар миш-мишдан бўлак нарса эмас. Онам бир йилдан буён мени уйлантиришга жиддий аҳд қилган. Аммо бандаси минг уринса ҳам, пешанага ёзган вақтда тўй бўлар экан. Менинг ҳам тақдиримга чиройли, оқила ва оилапарвар инсон ёзилгандир, деб умид қиляпман, — дейди актёр Шаҳзод Султонов.
Озод Хуррамов — 21 ёшда
Аслида бу рўйхатга блогер ва актёр Озод Хуррамовни киритмаслигимиз керак эди. Чунки у бошқа қаҳрамонларимиздан анча ёш. Аммо талабгир инстаблогернинг шахсий ҳаёти ҳаммага қизиқ.
— Вой, уйланиш ҳақида ўйлаётганим йўқ. Ҳали ёшман-ку. Аммо уйланишдан аввал қиладиган ишларим кўп, — дейди инстаблогер Озод Хуррамов.
Мавзуга доир:
Изоҳ (0)