Португалияда экстремал иссиқлик тўлқини туфайли 1000 дан ортиқ одам вафот этди, деб ёзмоқда Reuters.
Қурғоқчиликдан азият чекаётган Португалияда ўтган ҳафта ҳаво ҳарорати 40 даражадан ошиб кетди. Сўнгги бир неча кун ичида ўлимлар сони камайган бўлса-да, мамлакат бош санитария шифокори Грасе Фрейтаснинг таъкидлашича, уларнинг кўрсаткичи йилнинг шу даври учун нормал даражадан юқори.
Бундан ташқари, юқори ҳарорат ва давом этаётган қурғоқчилик сабаб Португалия ўрмон ёнғинлари ичида қолган.
«Португалия сайёрамизнинг экстремал иссиқликдан кўпроқ азият чекиши мумкин бўлган минтақаларидан биридир. Биз юқори ҳарорат даврига янада тайёр туришимиз керак», — дея огоҳлантирди у.
Аввал Португалияда 7 июлдан 13 июлгача бўлган иссиқлик тўлқини туфайли 238 киши ҳалок бўлгани ҳақида хабар берилганди, бироқ Фрейтаснинг сўзларига кўра, 18 июлгача бўлган даврда қурбонлар сони 1063 нафарга етган.
Лиссабон университети фанлар факультети тадқиқотчиси Карлос Антунеснинг қайд этишича, жазирама қурбонлари асосан қариялардир.
«Иқлим ўзгариши билан ўлимлар сонининг ортиши кутилмоқда, шу сабабли биз таъсирни минималлаштириш учун жамоавий соғлиқни сақлаш даражасида чоралар кўришимиз керак», — деди мутахассис.
Изоҳ (0)