АҚШ Raytheon Technologies ҳарбий саноат компаниясининг гипертовушли ракетаси муваффақиятли синовдан ўтказилгани ҳақида маълум қилди, деб ёзмоқда Reuters.
Маълум қилинишича, парвоз давомида аппарат товуш тезлигидан беш баравар тез учган, бу эса 2013 йилдан бери шу турдаги қуролнинг учинчи муваффақиятли синови бўлди.
Қўшма Штатларда Гипертовушли ҳаво қуроллар концепцияси (HAWC) дастури Мудофаа илғор тадқиқот лойиҳалари агентлиги (DARPA) томонидан бошқарилади. Бундай қуролларни ишлаб чиқариш шартномаси учун Raytheon ва Lockheed Martin Cоrp компаниялари кураш олиб бормоқда.
Сентябрь ойидан бери тўртта гипертовушли қурол синовдан ўтказилган. Raytheon маҳсулоти синови икки сафар ҳам муваффақиятли якунланди, Lockheed синови эса бир марта муваффақиятли ўтган, бир марта муваффақиятсизликка учраган.
Умуман олганда, Қўшма Штатлар ва унинг глобал рақобатчилари гипертовушли қуролларнинг тезлиги ва манёврлиги устида жадал ишламоқда — чунки бу хусусиятлар ушбу қуролларни кузатиш ва ушлаб қолишни қийинлаштиради. Гипертовушли қуроллар атмосферанинг юқори қатламларида товуш тезлигидан беш баравар кўпроқ ёки соатига 6200 километр тезликда учади.
Аввалроқ АҚШ Air-Launched Rapid Response Weapon (ARRW) гипертовушли ракетаси муваффақиятли синовдан ўтказилгани ҳақида хабар берган эди.
Мавзуга доир: Ҳиндистон ядро жанговар заряди билан уча оладиган Агни-IV ракетасини синовдан ўтказди
Изоҳ (0)