Тошкент давлат техника университети ўқитувчиси оралиқ имтиҳонга баҳо қўйиш учун пул талаб қилиб, уларни олганда ушланди. Бу ҳақда Тошкент шаҳри судлари маълум қилди.
Унга кўра, геология-қидирув ва кон-металлургия факультети кончилик иши кафедраси катта ўқитувчиси шу факультетнинг 2-босқич талабаларидан оралиқ назорат имтиҳонларига баҳо қўйиб бериш учун пул йиғиб беришларини талаб қилган. Акс ҳолда, уларга қониқарсиз баҳо қўйилиши ва оралиқ имтиҳонлардан ўтказилмаслигини айтиб қўрқитган.
Талабалар имтиҳонни топшира олмаслигини айтгани учун пул бўлса керак деб ўйлаб, 3 баҳога 100 минг, 4 ва 5 баҳоларга 150 минг сўм пул талаб қилинган. Гуруҳ сардори пул тайёрлигини айтиб телефон қилганда мен супермаркетда эдим. Келди. Пулни бериш жараёнида ички ишлар ходимлари томонидан тайёрланган пулни — 2 миллион 300 минг сўмни олаётган пайтимда қўлга олишди, — дейди муаллим.Аниқланишича, 49 ёшли судланувчи учун бу биринчи марта судланиши эмас. У аввал ҳам Жиноят кодексининг 211-моддаси (пора бериш) билан белгиланган жиноятни содир этишда айбли деб топилган.
Суд залида айбланувчи 3 нафар фарзандидан бирининг ногирон экани, унга дори олиши учун ҳар ойда катта маблағ сарфлашини маълум қилган.
Ҳукмга кўра, ўқитувчи Жиноят кодексининг 214-моддаси (давлат органи, давлат иштирокидаги ташкилот ёки фуқароларнинг ўзини ўзи бошқариш органи хизматчисининг қонунга хилоф равишда моддий қимматликлар олиши ёки мулкий манфаатдор бўлиши) билан айбли деб топилиб, базавий ҳисоблаш миқдори (БҲМ)нинг 50 баравари миқдорида, яъни 13 миллион 500 минг сўм жаримага тортилди.
Изоҳ (0)