Самарқанд ва Сирдарё вилоятларида ўқишга киритиш ҳамда ўқишни кўчириб беришни ваъда қилган фирибгарлар ушланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Ургут туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Унда фуқаро Д.B. бошқа бир фуқаро А.ни танишлари орқали Қозоғистондаги университетлардан бирига тўғридан-тўғри 3 курсга ўқишга киритиб, кейинчалик ўқишини Ўзбекистонга кўчириб беришини айтгани аниқланган. У эвазига 3 500 долларни олган вақтида ушланган.
Шунингдек, Д.B. фуқаро М.ни қўшни Тожикистондаги университетга ўқишга киритиб, Ўзбекистонга кўчириб бериш эвазига 3 минг доллар олган.
Бундан ташқари, департамент ҳамда ДХХнинг Гулистон тумани бўлимлари томонидан ўтказилган тезкор тадбирда фуқаро Ф.Г. қўлга тушган. У бошқа бир фуқаро Р.ни танишлари орқали Украинадаги университетлардан бирида ўқиётгани ҳақида ҳужжат қилиб, ўқишини Гулистон давлат университетига кўчириб беришни ваъда қилган. Эвазига 3 200 доллар сўраб, шундан 1 500 долларни олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Мавзуга доир:
- Фарғона давлат университетига ўқишга киритиб қўйиш учун фуқародан 11 минг доллар олган шахс ушланди
- Сурхондарёда Қозоғистондаги университетга киритиб қўйишни айтиб фуқаро пулларини ўзлаштирган шахс ушланди
- Ўзбекистон давлат жисмоний тарбия ва спорт университетига 7 минг доллар эвазига ўқишга киритиб қўймоқчи бўлган шахс ушланди
Изоҳ (0)