Samarqandda fuqarolarning xorijdagi o‘qishini O‘zbekistonga ko‘chirib berish uchun 6500 dollar olgan shaxs ushlandi

Samarqand va Sirdaryo viloyatlarida o‘qishga kiritish hamda o‘qishni ko‘chirib berishni va’da qilgan firibgarlar ushlandi, deb xabar bermoqda Iqtisodiy jinoyatlarga qarshi kurashish departamenti.

Qayd etilishicha, Bosh prokuratura huzuridagi departamentning Urgut tuman bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Unda fuqaro D.V. boshqa bir fuqaro A.ni tanishlari orqali Qozog‘istondagi universitetlardan biriga to‘g‘ridan to‘g‘ri 3 kursga o‘qishga kiritib, keyinchalik o‘qishini O‘zbekistonga ko‘chirib berishini aytgani aniqlangan. U evaziga 3 500 dollarni olgan vaqtida ushlangan.

Shuningdek, D.V. fuqaro M.ni qo‘shni Tojikistondagi universitetga o‘qishga kiritib, O‘zbekistonga ko‘chirib berish evaziga 3 ming dollar olgan.

Bundan tashqari, departament hamda DXXning Guliston tumani bo‘limlari tomonidan o‘tkazilgan tezkor tadbirda fuqaro F.G. qo‘lga tushgan. U boshqa bir fuqaro R.ni tanishlari orqali Ukrainadagi universitetlardan birida o‘qiyotgani haqida hujjat qilib, o‘qishini Guliston davlat universitetiga ko‘chirib berishni va’da qilgan. Evaziga 3 200 dollar so‘rab, shundan 1 500 dollarni olgan vaqtda ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.