Фарғона вилоятидаги учта туманда аҳоли хонадонлари томига қуёш панелларини ўрнатиш ишлари бошланди. Бу ҳақда «Дарё»га Фарғона ҳудудий электр тармоқлари корхонаси ахборот хизмати маълум қилди.
Қайд этилишича, Фарғона туманидаги «Миндонобод» ва «Новкент», Ёзёвон туманидаги «Қатортол», Қўштепа туманидаги «Ўқчи» маҳалла фуқаролар йиғинларида жойлашган хонадонлар қуёш панеллари ўрнатиш учун танлаб олинган.
Дастлабки босқичда Фарғона тумани «Новкент» маҳалласи ҳудудидаги 426 та хонадоннинг 108 тасига қуёш панелларини ўрнатиш режалаштирилган.
Бундан ташқари, лойиҳанинг илк босқичида туманнинг «Миндонобод» МФЙ ҳудудидаги 290 та хонадонга ҳар бирининг қуввати 750 ватт бўлган қуёш панелларини ўрнатиш ишлари бошланган.
Мазкур қуёш панеллари хонадонлардаги ёритиш чироқлари, телевизор, компьютер каби электр жиҳозларини марказий электр таъминотидан алоҳида, мустақил равишда таъминлаш имконини беради.
«Битта хонадонга ўрнатилган электр энергиясининг қайта тикланувчи манбасидан битта хонадон бир ойда камида 168-170 киловатт тежаб қолишига эришилмоқда. Битта хонадоннинг бир йиллик истеъмоли ҳисоб-китоб қилинганда, бу ўртача 377 минг сўмга тўғри келади. Қуёш панелларини ўрнатишнинг яна бир қулай томони шундаки, хонадон тармоқдан тўла узилганда мол-мулк ва ер солиғи бўйича муайян имтиёзлар берилиши кўзда тутилган», — дейди Фарғона тумани электр тармоқлари корхонаси мутахассиси Отабек Зиёбов.
Қуёш панеллари ўрнатилиши натижасида «Миндонобод» ва «Новкент» маҳаллалари ҳудудида қарийб 82-85 фоиз электр энергияси истеъмоли тежалиши айтилмоқда.
Изоҳ (0)