Қашқадарёнинг собиқ ҳокими Озод Пармонов президент эътирофига сазовор бўлди

Қашқадарё вилоятининг собиқ ҳокими, 1995 йилдан 1998 йилга қадар вилоятга раҳбарлик қилган Озод Пармонов президент эътирофига эришди. Бу ҳақда қашқадарёлик блогер Ҳусан Комилжонов маълум қилди.

Маълум қилинишича, бугун, 18 июль куни вилоят ҳокими Муроджон Азимов бошчилигида бир гуруҳ нуронийларни «Меҳнат фахрийси» кўкрак нишони билан тақдирлаш маросими бўлиб ўтган.

Тадбирда 1995 йил 29 ноябрдан 1998 йил 3 июнга қадар вилоятни бошқарган Озод Пармонов «Меҳнат фахрийси» кўкрак нишони билан тақдирланган.

«Биласизми, эътироф этилган, айниқса давлат раҳбарининг эътирофига эришган инсон кўпинча бу менинг эмас, жамоамнинг ютуғи, меҳнати самараси дейишади. Мен шу кўкрак нишонни олган пайтимда, нима десам бўларкан деб ўйлаб қолдим. Жамоамнинг меҳнати самараси десам, нега ўтган 20 йил давомида эътироф этилмадик? Нега шунча йил кутилди? Шунинг учун, мен бу эътирофни Янги Ўзбекистоннинг янги ислоҳоти самараси, президент Шавкат Мирзиёевнинг адолатли сиёсати натижаси деган бўлардим. Ва бунинг учун президентимизга ташаккур изҳор қиламан», — дейди Озод Пармонов «Дарё» мухбири билан мулоқотда.

Озод Пармоновнинг қўшимча қилишича, у вилоят ҳокими сифатидаги фаолияти якунлангач, 20 йил умуман эсланмаган, меҳнати қадрланмаган.

«Президент Шавкат Мирзиёев томонидан тўрт марта эътироф этилдим. Бугун олган Меҳнат фахрийси кўкрак нишони шу эътирофларнинг тўртинчиси бўлди», — дейди у.

Вилоят ҳокимлиги ахборот хизмати раҳбари Аҳрор Содиқовнинг «Дарё»га қўшимча қилишича, бугун 64 нафар киши шу эътирофга муносиб кўрилган.

«Шундан кўкрак нишоннинг биринчи даражалиси 34 та бўлса, иккинчи даражалиси 30 тани ташкил қилади», — дейди Аҳрор Содиқов.

Президентнинг «Меҳнат фахрийси» кўкрак нишонини таъсис этиш тўғрисидаги қарорида келтирилишича, биринчи даражали кўкрак нишони билан мукофотланган шахслар базавий ҳисоблаш миқдорининг тўрт баравари миқдорида, иккинчи даражали кўкрак нишони билан мукофотланган шахслар базавий ҳисоблаш миқдорининг уч баравари миқдорида бир йўла тўланадиган пул мукофоти олади. Шунингдек, кўкрак нишони билан мукофотланган шахслар Соғлиқни сақлаш вазирлиги томонидан белгиланадиган тартибда тиббий хизматдан имтиёзли фойдаланиш ҳуқуқига эга бўлади.

Аввалроқ Қашқадарёнинг биринчи ҳокими Темир Хидиров 77 ёшида вафот этгани хабар берилганди.