Буюк Британиянинг кичик савдо алоқалари вазири, бош вазирликка номзод Пенни Мордонт The Telegraph газетасига ёзган мақоласида айтишича, агар у Буюк Британия ҳукумати раҳбари этиб тайинланса, Украинада уруш бошлаган Россиянинг «шафқатсиз тажовузи»га қарши саъй-ҳаракатларига раҳбарлик қилади.
Мордонтнинг қайд этишича, Британия Россия билан қарама-қаршиликка интилмаяпти, бироқ Лондон Москванинг ҳаракатларига «қўл қовуштириб туролмайди». Украина тупроғидаги жанглар кенг «қадриятлар ва идеаллар тўқнашуви»нинг бир қисмидир, деб ёзди у ҳамда бош вазир Борис Жонсоннинг Киевни қўллаб-қувватлаш сиёсатини давом эттиришга ваъда берди.
Сиёсатчининг айтишича, агар у ушбу лавозимга тайинланса, Британия АҚШ, ЕИ ва бошқа асосий ҳамкорлар билан Украинага ҳарбий ёрдам кўрсатишни мувофиқлаштириш бўйича ҳамкорликни кучайтиради ва шу билан бирга «европалик иттифоқчиларини янада кўпроқ ишлар қилишга ундайди». Лондон Россияга қарши санкциялар қўллашда «Катта еттилик давлатлари орасида етакчи бўлиб қолади» ва уларнинг бажарилишини назорат қилади, дея қўшимча қилди Мордонт.
Бош вазирликка номзод, шунингдек, Украина ҳарбийларини тайёрлаш дастурини кенгайтириш имкониятларини ўрганишга ваъда берди. Лондон Қироллик денгиз флоти бошчилигида «Қора денгизнинг муҳим стратегик сувларида алоқани яхшилаш ва миналарни тозалаш ишларини бошқариш учун» ишчи гуруҳ тузади, деб ёзган Мордонт.
Британия бош вазирлиги учун Мордонтдан ташқари собиқ молия вазири Риши Сунак, ташқи ишлар вазири Лиз Трасс, уй жой қурилиши бўйича собиқ вазир ўринбосари Кеми Баденок ва жамоатлар палатасининг халқаро қўмитаси раҳбари Том Тугендхат даъвогарлик қилмоқда.
Айни пайтда Буюк Британия бош вазири вазифасини 7 июль куни истеъфога чиқишини эълон қилган Борис Жонсон бажармоқда. У ҳукумат аъзоси Крис Пинчернинг маст ҳолатда жанжал чиқаргани ва шилқимлик қилгани туфайли юзага келган шов-шувдан кейин истеъфо берди. Жонсон Пинчер аввалроқ жинсий шилқимликларда айбланганини билгани, аммо шунга қарамай уни юқори лавозимларга тайинлагани маълум бўлди.
Изоҳ (0)