Озарбайжон ва Арманистон ташқи ишлар вазирлари Жейҳун Байрамов ва Арарат Мирзоян Тбилисида музокаралар ўтказди, унда мамлакатлар ўртасидаги муносабатларни нормаллаштириш масалалари муҳокама қилинди. Бу ҳақда Озарбайжон ТИВ матбуот хизмати хабар берди.
Байрамов барча саъй-ҳаракатларни Озарбайжон ва Арманистон ўртасида яхши қўшничилик ва давлатлараро муносабатларни ўрнатишга йўналтириш ҳамда Уч томонлама баёнотнинг барча қоидаларини, хусусан, Арманистон қуролли кучларини Озарбайжон ҳудудидан олиб чиқиб кетишни тўлиқ амалга ошириш зарурлигини маълум қилди (Тоғли Қорабоғдаги сўнгги можаро якунларига кўра, ҳудудларнинг бир қисми Бокуга берилди).
«Гуманитар масалаларга келсак, вазир Жейҳун Байрамов бедарак йўқолган 4000 га яқин озарбайжонлик тақдирига ойдинлик киритиш муҳимлигини таъкидлади», — дея қўшимча қилади Озарбайжон ТИВ.
Шу билан бирга, Арманистон ТИВ раҳбари Тоғли Қорабоғ можаросини сиёсий йўл билан ҳал этиш тинчликка эришиш учун муҳим эканини айтган ва шу муносабат билан вазир Европа хавфсизлик ва ҳамкорлик ташкилотининг Минск гуруҳи «ҳамкорлик институти ва тажрибасидан фойдаланиш муҳимлигини таъкидлаган». Мирзоян, шунингдек, арманистонлик ҳарбий асирларни озод қилиш ва ватанига қайтариш, бедарак йўқолганларнинг тақдирига ойдинлик киритиш масаласига тўхталди.
Апрель ойида, 2020 йилги можаро тугаганидан бери биринчи марта Ереван ва Боку тинчлик шартномаси бўйича аниқ таклифларни муҳокама қила бошлаган эди. Озарбайжон президенти Илҳом Алиев ва Арманистон бош вазири Никол Пашинян Брюсселда учрашиб, Арманистон ва Озарбайжон чегараларини аниқлаш учун икки томонлама комиссия тузишга келишиб олган.
Бироқ 16 июль куни Озарбайжон Мудофаа вазирлиги арман ҳарбийлари Калбажар вилоятининг Зяйлик аҳоли пунктидаги позицияларини турли ўқ отувчи қуроллардан ўққа тутгани ҳақида хабар берди. Боку жавоб чораларини кўрганини айтди. Арманистон Мудофаа вазирлиги Бокуни чегарадаги позицияларини ўққа тутганликда айблаб, арман ҳарбийлари ўз навбатида жавоб чораларини кўрганини таъкидлади.
Изоҳ (0)