Россия ҳамда Украина дон экспорти бўйича мувофиқлаштириш марказини яратиш борасида келишувга эришди

Россия ва Украина делегациялари иштирокчилари Истанбулда ўтган тўрт томонлама учрашувда дон экспорти бўйича мувофиқлаштириш марказини яратиш борасида келишувга эришди. Бу ҳақда Туркия мудофаа вазирлиги хабар берган.

Бундан ташқари томонлар портлар ва дон ортилган йўналиш кемалари хавфсизлигини таъминлашни ҳам келишиб олган. Вазирлик ахборотига кўра келаси ҳафтада делегациялар яна Туркияда кўришади ва «дон йўлаги»ни ташкил қилиш хусусидаги ҳужжатларни имзолайди.

«Истанбулда ижобий ва конструктив муҳитда ўтган музокараларда бир қатор техник масалалар, мувофиқлаштириш марказини тузиш, портлардан чиқиш ва кемалар йўналишларида хавфсизликни таъминлаш борасида келишувларга эришилди. Учрашувда Россия ҳамда Украина делегациялари келаси ҳафтада муҳим ҳужжатни имзолаш олдидан унинг барча тафсилотларини ўзаро келишиб олди»,— дейилади Туркия вазири Хулуси Акаранинг баёнотида.

БМТ ҳам мазкур музокараларни ижобий баҳолаган. Ташкилот бош котиби Антониу Гуттериш Украина донини етказиб бериш ҳақидаги келишувга оптимизм билан қараётганини таъкидлаган.

«Бу биринчи учрашув эди ва ундаги натижалар ўта қувонарли. Кейинги қадамларни ташлаш керак, биз келишувга эришилишига умид қиламиз. Мазкур жараёнга оптимистик нигоҳ билан қараяпман»,— деган Гуттериш («Интерфакс» иқтибоси).

13 июль куни Истанбулда Россия, Украина, БМТ ҳамда Туркия делегацияларининг учрашуви бўлиб ўтган. Бу май ойида Россия ва Украина делегацияларининг тинчлик бўйича музокаралари тўхтатилганидан кейинги илк учрашуви. Эслатиб ўтамиз, Россия ТИВ майдаги музокаралар Киев ташаббуси билан тўхтатилганини эълон қилган.

Германия ташқи ишлар вазирлиги маълумотларига кўра Қора денгиз портларида 25 миллион тонна дон блокланиб қолган. Бу Россия қўшинлари 24 февралда Украина ҳудудида махсус ҳарбий операцияларни бошлаганидан кейин денгиз йўлларининг ёпилиб қолиши оқибатида рўй берган. Украина ҳукумати Россия ўғирланган доннинг ўғирланишида иштирок этган деб ҳисобламоқда. Аммо Москва мазкур баёнотларни бир неча марта инкор қилган. БМТ Киевнинг Москвани дон ўғирлашда айблаётганини текшира олмаслигини баён этган.