Нью-Йорк университетида бир гуруҳ жарроҳлар тадқиқот доирасида генетик модификацияланган чўчқа юрагини мияси ўлган одамга кўчириб ўтказди, деб ёзади «Gazeta.ru».
NYU Langone Health нашри ёзишича, ушбу жараён бундай турдаги биринчиси бўлиб, ҳайвонлар органларини модификация қилиб, уларни трансплантацияга муҳтож одамларда қўллаш имкониятларини баҳолашга уриниш йўлида олға қадам бўлди.
Орган ўрнатилган 72 ёшли бемор Лоуренс Келлининг мияси ўлган. Унинг оиласи жасадни чўчқанинг модификацияланган юраги вафот этган одамнинг танасида қанчалик даражада ишлашини аниқлашга қаратилган тадқиқот учун беришга рози бўлган.
Июнь ойида Келлига трансплантация амалга оширилгач, июлда тадқиқотчилар гуруҳи бу жараённи яна бир вафот этган шахс — 64 ёшли Альва Капуано устида ҳам такрорлади.
Нью-Йорк университети Лангоун трансплантация институти директори доктор Роберт Монтгомери айтишича, жараёнлар қабул қилувчи таналар чўчқа юрагини қанчалик даражада қабул қилганини янада чуқурроқ ўрганиш имконини берган.
«Биз янада кўпроқ мониторинг ўтказиб, билогияни яхшилаб тушуниб олишимиз ва бизга номаълум бўлган нарсаларни аниқлашимиз мумкин», — деди мутахассис.
Унинг қўшимча қилишича, уларнинг тадқиқоти ноёб бўлган, чунки улар тажриба ускуналари ва дорилардан фойдаланмасдан, оддий шароитларни яратишга уринган.
Эслатиб ўтамиз, январь ойида америкалик шифокорлар биринчи марта 57 ёшли Дэвид Беннетга генетик жиҳатдан ўзгартирилган чўчқанинг юрагини муваффақиятли трансплантация қилган эди. Аммо у март ойида вафот этди.
Изоҳ (0)