Бухоро шаҳри марказида жойлашган «Карвон» бозори қаршисидаги автошоҳбекатда йўловчиларга хизмат кўрсатаётган ҳайдовчилардан пул ундириб келган йўлтўсарлар қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, ҳайдовчилар вилоят ИИБ ЖҚБ ҳамда бошқа ҳуқуқни муҳофаза қилувчи идораларга мурожаат қилиб, патент пулидан ташқари, бир гуруҳ уюшган гуруҳ аъзоларига пул тўлашга мажбурланаётгани ҳақида билдирган.
Мурожаат юзасидан тезкор тадбир ўтказилган ва ҳайдовчилар шикояти тасдиғини топган.
Р.Ж. исмли шахс шериги Ш.Б. билан олдиндан жиноий тил бириктириб, автошоҳбекатда йўловчиларга хизмат кўрсатувчи ҳайдовчиларга таҳдид қилиб, улардан 15 минг сўмдан 500 минг сўмгача бўлган миқдорда пул ундириб келган.
«Зўравонлар гўёки ўзини бақувват спортчилардек тутиб, 2022 йилнинг май ойидан ҳозирги кунга қадар бўлган вақт оралиғида товламачилик ва зўравонлик билан киракашлардан пул ундириб келган», — дейди Шуҳрат Жалолов.
Ҳолат юзасидан Р.Ж. ва Ш.Б. ларга нисбатан Жиноят кодексининг 165-моддаси 2-қисми «в» (товламачилик) банди билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)