Наманганлик гулчилар Бишкек ва Самарқандни кўкаламзорлаштиришда иштирок этмоқда. Бу ҳақда «Дарё» мухбири Азизбек Абдувалиев хабар бермоқда.
Наманганда бўлиб ўтган 61-халқаро гуллар фестивалига Бишкек мери Эмилбек Абдуқодиров бошчилигидаги делегация ҳам меҳмон бўлиб келган ва бу сафар давомида Қирғизистон пойтахтига Намангандан 500 минг туп гулни беғараз етказиб бериш ҳақида келишувга эришилганди.
Бугунги кунда Бишкекда 10 гектар майдонда барпо этилаётган «Балалик» номли болалар паркида гулчилар Наманганда етиштирилган гулларни олиб бориб, ўзига хос ландшафт дизайни асосида экиш ишларига киришди.
«Жами 500 минг туп гул экишни режалаштирилганмиз. Ҳозирга қадар биз учун ажратилган ҳудудда ерларни тайёрлаб, 350 минг тупдан ортиқ гуллар экилишига эришилди. Бишкекда 30 нафар гулчимиз қирғизистонлик ҳамкасбларига кўмак беряпти, — дейди Наманган шаҳар ободонлаштириш бошқармаси бошлиғи Ҳусниддин Қозоқбоев.
Наманганлик гулчилар жорий йил 15—16 сентябрь кунлари Шанхай ҳамкорлик ташкилотининг навбатдаги саммитига мезбонлик қиладиган Самарқанд шаҳрининг марказий кўчалари ва хиёбонларини ҳам гуллар билан безатмоқда.
«Самарқандда биз томонимиздан 10 хил турдаги 300 минг туп гул экилиши кўзда тутилган. Бугунги кунгача 100 минг тупдан ортиқ гул экишга улгурдик. Бу ерда ҳам 30 нафарга яқин ходимларимиз меҳнат қилмоқда», — дейди Ҳусниддин Қозоқбоев.
Маълумот учун, Наманганда бўлиб ўтган 61-халқаро гуллар фестивали кунлари Самарқанд делегацияси учун амалий семинар ташкилланган ва бу семинар доирасида гуллар шаҳридаги кўкаламзорлаштириш тажрибаси билан ўртоқлашилган эди.
Изоҳ (0)