Андижон вилоятидаги юридик хизмат кўрсатиш марказлари 1 июлдан бошлаб мактаб, боғча ва поликлиникаларга хизмат кўрсатишни бошлади. Бу ҳақда «Дарё»га вилоят адлия бошқармаси ахборот хизмати маълум қилди.
Маълум қилинишича, президентнинг 2022 йил 18 мартдаги «Юридик хизмат кўрсатиш марказлари фаолиятини янада кенгайтириш бўйича қўшимча чора-тадбирлар тўғрисида»ги қарорига асосан жорий йилнинг 1 августдан бошлаб юридик хизмат кўрсатиш марказлари томонидан хизмат билан таъминланмаган давлат органлари ва ташкилотларининг қуйи бўлинмаларига юридик хизмат кўрсатилишини йўлга қўйиш режалаштирилган.
«Шу муносабат билан вилоятимизнинг барча шаҳар ва туманларида Адлия вазирлигининг ишчи гуруҳи томонидан қарорнинг мазмун моҳиятини тушунтиришга қаратилган ҳамда «э-ҳуқуқшунос» электрон тизимидан фойдаланиш бўйича ўқув-семинарлари ўтказилмоқда. Унда хизмат кўрсатилиши белгиланган маҳалла ва оилани қўллаб-қувватлаш бўлими, аҳоли бандлигига кўмаклашиш маркази, солиқ инспекцияси, давлат умумий ўрта таълим мактаблари ҳамда мактабгача таълим ташкилотлари, кўп тармоқли ва оилавий поликлиникаларнинг масъуллари иштирок этмоқда.
Семинарларда давлат ташкилотларида юридик хизмат кўрсатиш билан боғлиқ маълумот ва жараёнларни электрон равишда йиғиш, қайта ишлаш, таҳлил қилиш имконини берувчи «э-ҳуқуқшунос» электрон тизимининг қулайликлари, давлат ташкилотларининг мулкий ҳамда бошқа ҳуқуқлари, қонуний манфаатлари ўз вақтида самарали ҳимоя қилиниши, давлат ташкилотлари томонидан қабул қилинаётган ҳужжатларнинг қонуний, ҳар томонлама пухта ва сифатли бўлишини таъминлаш эканлиги тушунтирилмоқда», — дейди вилоят адлия бошқармаси бошлиғининг биринчи ўринбосари Муҳаммадбобур Каримов.
Ўтказилган семинарлар давомида эксперимент тартибида биттадан мактаб ҳамда мактабгача таълим ташкилотлари танлаб олиниб, ушбу муассасаларда «э-ҳуқуқшунос» электрон тизими билан ишлаш амалиёти ўргатилмоқда.
Изоҳ (0)