Buxoro shahri markazida joylashgan “Karvon” bozori qarshisidagi avtoshohbekatda yo‘lovchilarga xizmat ko‘rsatayotgan haydovchilardan pul undirib kelgan yo‘lto‘sarlar qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, haydovchilar viloyat IIB JQB hamda boshqa huquqni muhofaza qiluvchi idoralarga murojaat qilib, patent pulidan tashqari, bir guruh uyushgan guruh a’zolariga pul to‘lashga majburlanayotgani haqida bildirgan.
Murojaat yuzasidan tezkor tadbir o‘tkazilgan va haydovchilar shikoyati tasdig‘ini topgan.
R.J. ismli shaxs sherigi Sh.B. bilan oldindan jinoiy til biriktirib, avtoshohbekatda yo‘lovchilarga xizmat ko‘rsatuvchi haydovchilarga tahdid qilib, ulardan 15 ming so‘mdan 500 ming so‘mgacha bo‘lgan miqdorda pul undirib kelgan.
“Zo‘ravonlar go‘yoki o‘zini baquvvat sportchilardek tutib, 2022-yilning may oyidan hozirgi kunga qadar bo‘lgan vaqt oralig‘ida tovlamachilik va zo‘ravonlik bilan kirakashlardan pul undirib kelgan”, — deydi Shuhrat Jalolov.
Holat yuzasidan R.J. va Sh.B. larga nisbatan Jinoyat kodeksining 165-moddasi 2-qismi “v” (tovlamachilik) bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)