Gaiti sobiq prezidenti Jovenel Moiz o‘ldirilganiga bir yil to‘lgan bo‘lsa-da, AQSH Davlat departamenti ushbu ish bo‘yicha tergovda hech qanday rivojlanish yo‘qligidan tashvishda ekanini bildirdi.
“Biz Gaitida ushbu qotillik bo‘yicha tergovdagi cheklangan yutuqlardan xavotirdamiz’’, — dedi AQSH davlat kotibi Entoni Blinken departament tomonidan e’lon qilingan bayonotda.
Uning ta’kidlashicha, allaqachon beshinchi sudya tayinlangan, ‘‘Gaiti hukumati esa ishda ishtirok etayotgan sudyalarni himoya qilish va asosiy dalillarni saqlash uchun xavfsizlik choralarini kuchaytirish bo‘yicha sud tizimining chaqiruvlariga to‘g‘ri javob bermagan”.
Blinken Gaiti hukumatini Moizning o‘ldirilishi bo‘yicha “mustaqil va puxta tergov”ni davom ettirishga va aybdorlarni javobgarlikka tortishga chaqirdi.
“Umid qilamizki, Gaiti hukumati va tegishli xalqaro hamkorlarning birgalikdagi sa’y-harakatlari yaqin orada ushbu jinoyatga oydinlik kiritadi, shunda adolat qaror topadi va Gaiti xalqi prezident Moizning o‘ldirilishi jazosiz qolmaganini ishonch bilan ayta oladi”, — dedi davlat kotibi.
Gaiti prezidenti 2021-yil 7-iyulga o‘tar kechasi o‘z qarorgohida o‘ldirilgan va uning rafiqasi og‘ir yaralangan edi. Suiqasdda yollanma askarlar guruhi ishtirok etgan, jumladan, guruhda pasportlari bo‘yicha 26 nafar kolumbiyalik va Gaitida yashovchi ikki amerikalik bo‘lgani aniqlangan.
Mavzuga doir:
Izoh (0)