Андижон вилояти Соғлиқни сақлаш бошқармаси бошлиғи Салоҳиддин Юсупов ҳамда унинг биринчи ўринбосари Шоҳрухмирзо Мамажоновлар лавозимидан озод этилди. Бу ҳақда манбаларга таяниб «Дарё» мухбири хабар бермоқда.
Таъкидланишича, 2020 йилнинг декабрь ойидан буён вилоят Соғлиқни сақлаш бошқармасига раҳбарлик қилиб келаётган Салоҳиддин Юсупов саломатлиги туфайли ўз хоҳишига кўра лавозимидан озод этилган. Унинг ўрнига бошқарма бошлиғи вазифасини вақтинча бажариш аввал шу лавозимда ишлаган, айни пайтда Республика ихтисослаштирилган дерматовенерология ва косметология илмий амалий тиббиёт маркази Андижон вилоят ҳудудий филиали директори вазифасида ишлаётган Қудрат Ярқулов тайинланган.
Қудрат Ярқулов узоқ йиллар вилоят тери-таносил касалликлари диспансерида турли лавозимларда ишлаган. 2015—2017 йилларда вилоят Соғлиқни сақлаш бошқармаси бошлиғи сифатида фаолият юритган.
Бошқарма бошлиғининг биринчи ўринбосари Шоҳрухмирзо Мамажонов ўрнига эса Андижон вилояти ҳокими тавсияси билан Қўрғонтепа туман тиббиёт бирлашмаси бошлиғи Абдукарим Абдуваҳобов тайинланган.
Аввалроқ Андижон вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Отабек Турсунов ишдан олингани айтилганди.
Изоҳ (0)