Ҳукумат қарори билан Автомототранспорт воситалари ҳайдовчиларини тайёрлаш, қайта тайёрлаш ва уларнинг малакасини оширишни амалга оширувчи таълим ташкилотларининг рейтингини аниқлаш тартиби тўғрисида низом тасдиқланди.
Низомга кўра, рейтинг баҳолаш қуйидаги кўрсаткич (индикатор)лар асосида амалга оширилади:
- таълим ташкилотлари битирувчиларининг ҳайдовчилик гувоҳномасини олиш учун назарий ва амалий имтиҳон натижалари;
- таълим ташкилотлари битирувчиларининг ҳайдовчилик гувоҳномасига эга бўлгандан кейин, йил якунигача йўл ҳаракати қоидаларига амал қилмаслик ҳолларидаги жарима баллари;
- йил якунигача қонуний кучга кирган суд қарорига асосан таълим ташкилотлари битирувчилари айби билан содир этилган йўл-транспорт ҳодисалари сони;
- таълим ташкилотларида тўлиқ штатда фаолият юритадиган олий маълумотга ёки илмий даражага эга ўқитувчиларнинг сони тўғрисида маълумотлар.
Таълим ташкилотлари рейтинги қуйидагича тоифаларга ажратилади:
- 81 баллдан 100 баллгача — «яшил»;
- 51 баллдан 80 баллгача — «сариқ»;
- 50 баллдан паст — «қизил».
Рейтинг натижалари ҳар йили 25 январда ОАВ ва ижтимоий тармоқларда эълон қилинади.
Низом 2022 йил 1 сентябрдан эътиборан кучга киради.
Аввалроқ Ўзбекистонда ҳайдовчиликка ўқитиш ва гувоҳнома бериш бўйича янги тизим яратилиши, Ўзбекистонда қоидабузар ҳайдовчилар учун жарима баллари тизими жорий этилиши ҳамда Ўзбекистоннинг барча вилоятларида замонавий автомактаб ва имтиҳон марказлари ташкил этилиши ҳақида хабар берилганди.
Мавзуга доир:
- «Кам пулга ҳайдовчиларни тайёрловчи автомактаблар коррупцияга йўл қўяди» — йўл ҳаракати хавфсизлиги бўйича мутахассис
- «Кимки биз атайлаб имтиҳонда йиқитганимизни ёки сертификат сотганимизни исботласа, мен унга 10 000 доллар бераман» — Комил Алламжонов
- Комил Алламжонов имтиҳон марказини яратиш қанчага тушишини айтди
Изоҳ (0)