Ижтимоий тармоқларда Тошкент шаҳар Ички ишлар бош бошқармаси ходимлари Zo‘r TV телеканали ҳудудидан барча ходимларни ташқарига чиқараётгани, ичкарига ҳам ҳеч ким киритилмаётгани ҳақида хабар тарқалди. Пойтахт ИИББ ҳолатга аниқлик киритди.
Қайд этилишича, 6 июль куни соат 08:56 да Тошкент шаҳар ИИББ навбатчилик қисмига Яшнобод туманидаги Zo‘r TV телеканали жойлашган ҳудудда 2 нафар номаълум шахс портловчи модда ўрнатаётгани ҳақида хабар келиб тушган. Мазкур хабар асосида зудлик билан Тошкент шаҳар ИИББ ходимлари ва бошқа мутахассислар воқеа жойига етиб борган.
Ҳудуд ўрганилганда портловчи ёки ҳаёт учун хавфли бўлган бошқа моддалар аниқланмаган.
«Хабар ўз тасдиғини топмади, хавотирга асос йўқ. Ҳозирда Zo‘r TV телеканали ўз иш фаолиятини доимгидек олиб бормоқда. Ҳолат юзасидан суриштирув ишлари давом эттирилмоқда.
Шубҳали ҳолатга бефарқ бўлмаган фуқароларга миннатдорчилик билдирамиз», — дейилади хабарда.
Изоҳ (0)