Тошкентда ёш бола қийноққа солиниб массаж қилингани ҳақида хабар берилган эди. Соғлиқни сақлаш вазири Беҳзод Мусаев бу хатти-ҳаракатларга муносабат билдирди.
Унинг таъкидлашича, ушбу хатти-ҳаракатлар нафақат тиббиёт, балки инсонийлик туйғуларига ҳам ётдир.
«Вазирликнинг бу каби ҳолатларга нисбатан позицияси аниқ ва қатъий: биз инсон ҳаёти ва саломатлигига хавф соладиган, қадр-қиммати ва шаънини топтовчи ҳар қандай хатти-ҳаракатга муросасиз муносабатдамиз.
Шунинг учун ҳам мазкур масала юзасидан ўрганиш натижалари ва хулосаларимизни, хусусан, уқалаш муолажасини бажарган шахснинг тегишли рухсатнома, сертификат, ижара шартномаси, физиотерапия йўналишида диплом ва малака тоифасига эга бўлмай фаолият юритганига доир фактларни ҳуқуқ-тартибот идораларига тақдим этамиз. Ишонамизки, тез орада ушбу ҳолат ўз ҳуқуқий баҳосини олади», — дейилади ССВ томонидан эълон қилинган вазир муносабатида.
Эслатиб ўтамиз, 5 июль куни ижтимоий тармоқларда кичик ёшли болани жисмоний оғритиб, тиббиёт талабларига мутлақо мос бўлмаган уқалаш муолажаси амалга оширилаётгани акс этган видеолавҳа тарқалиб, кенг муҳокамаларга сабаб бўлганди. Дастлабки ўрганиш натижаларига кўра, ушбу муолажани амалга оширган шахс тегишли рухсатнома ва сертификатга, физиотерапия йўналишида диплом ва малака тоифасига эга эмаслиги аниқланди.
Изоҳ (0)