Финляндия ва Швеция ташқи ишлар вазирлари Пекка Хаависто ҳамда Энн Линде НАТО штаб-квартирасида альянсга қўшилиш бўйича протоколларни имзолади. НАТО бош котиби Йенс Столтенберг икки давлатнинг аъзолигини ратификация қилиш жараёни бошланганини эълон қилди.
Ҳужжатларни НАТОга аъзо 30 та давлат элчилари ҳам имзолаган. «Бугун биз альянсга қўшилиш баённомасини расман имзолаяпмиз ва ратификация жараёнини бошлаяпмиз. НАТО эшиги Европанинг барча демократик давлатлари учун очиқ. Бугун Финляндия, Швеция ҳамда НАТО учун яхши кун, биз 32 аъзо давлат билан кучайиб бормоқдамиз», — деди Столтенберг.
Зарур ҳужжатлар альянс таркибидаги барча давлатлар томонидан ратификация қилингандан сўнг Финляндия ва Швеция НАТОга аъзо бўлади.
НАТО Финляндия ва Швецияда ядро қуроли жойлаштирилмаслигига кафолат бера олмаслигини билдирган. Россия президенти Владимир Путин бу икки давлатда альянснинг ҳарбий инфратузилмаси жойлаштирилса, Россия бунга акс тарзда жавоб беришини айтган. Россия билан чегара яқинида жойлашган Финляндиянинг Лаппеенранта шаҳри маъмурияти ўз ҳудудига НАТО базасини жойлаштиришга тайёрлигини билдирган.
Эслатиб ўтамиз, май ойида Финляндия ва Швеция Россиянинг Украинадаги ҳарбий амалиёти туфайли альянсга қўшилиш учун ариза берган эди. Туркия ҳар икки давлатни террорчиларни яширишда айблаб, ўларнинг аъзолигига қарши чиқди. Бир неча раунд музокараларидан сўнг Анқара альянснинг кенгайишига тўсқинлик қилмасликка рози бўлди. Бироқ бунинг учун Туркия президенти Ражаб Тоййиб Эрдўғон Швеция ва Финляндиядан қонунларни ўзгартиришни талаб қилди.
Изоҳ (0)