Украинадаги уруш туфайли кучайган табиий газ ва нефть тақчиллиги мамлакатларни яна энг ифлос қазилма — кўмирга қайтишга мажбур қилмоқда. Бу ҳақда Wall Street Journal хабар берди.
АҚШ, Европа ва Хитой каби дунёнинг йирик иқтисодиётга эга мамлакатлари иқлим ўзгаришига қарши курашиш учун кўмир истеъмолини камайтириш бўйича қарор қабул қилган эди.
Эндиликда ушбу давлатлар етарли миқдорда электр энергиясини таъминлаш учун қисқа муддатли кўмир харидларини кўпайтирмоқда.
Янги кўмир конлари ва ресурсларига инвестициялар қисқарганидан кейин уни ишлаб чиқариш ва сотиш бўйича рақобат деярли йўқолган эди. Бу йил эса нархлар янги рекорд даражага чиқмоқда.
Осиё учун асосий етказиб берувчи Австралиянинг Ньюкасл портидаги спот кўмир нархи ўтган ой биринчи марта бир тонна учун 400 доллардан ошди.
Россия Европа газ етказиб беришни тўхтатгандан сўнг, ЕИ ва унинг заводларини энергия билан таъминлаш учун кўмир сотиб олишда етакчилик қилмоқда.
2030 йилгача кўмирни энергия манбаи сифатида ишлатишдан бутунлай воз кечишга ваъда берган Германия энди кўпроқ импорт қилувчи давлатлар қаторига кирмоқда.
Ҳозирда кўпроқ кўмир истеъмоли Россия ёқилғиларидан кўра яхшироқ, — дейди энергетика секторига ихтисослашган Винсон & Элкинс ЛЛП юридик фирмасининг Лондондаги ҳамкори Алекс Мсиманг.
АҚШнинг баъзи штатлари кўмир энергиясидан фойдаланишни кучайтирмоқда, чунки ҳозирги аномал иссиқ ҳароратда электр энергиясига бўлган юқори талаб минтақавий электр тармоқларининг тўхтаб қолишига сабаб бўлиши мумкин.
Дунёдаги энг йирик кўмир истеъмолчиси Хитой ёқилғи ва ундан электр энергияси ишлаб чиқаришни кучайтирмоқда, бу эса бутун мамлакат бўйлаб электр энергияси узилишларига сабаб бўлиши ҳақидаги хавотирларни кучайтирмоқда.
Ҳиндистон ҳам энергияга бўлган талаб ортиб бораётгани сабабли кўмирга суянмоқда. Хусусан, апрель ойида мамлакатда кўмир ишлаб чиқариш рекорд даражада ўсган.
Халқаро энергетика агентлиги (IEA)нинг ўтган ой ҳисоботига кўра, Хитой ва Ҳиндистонда маҳаллий кўмир қазиб олиш 2021 йилда глобал инвестициялар ҳажмини 10 фоизга оширишга ёрдам берган.
IEA бу йил яна 10 фоизга ўсишни режалаштирган, чунки Хитой ва Ҳиндистон глобал энергия танқислигини бартараф этишга ҳаракат қилмоқда.
Сўнгги ўн йил ичида кўплаб йирик Ғарб мамлакатларида кўмирдан фойдаланиш ҳажми пасайиб, унинг ўрнини тоза энергия турлари эгаллади.
Шамол ва қуёш энергияси каби қайта тикланадиган энергия манбалари нархларнинг пасайиши, давлат субсидиялари ва мандатлари туфайли бозор улушини қўлга киритди.
Шундай бўлса-да, дунёнинг кўп қисмида тез ўсиб бораётган энергия эҳтиёжлари туфайли кўмирга глобал талаб яна кучайди. IEA прогнозларига кўра, бу йил талаб рекорд даражага чиқади.
Аввалроқ Осиёда кўмир нархи рекорд даражада ошгани ҳақида хабар берилган эди.
Изоҳ (0)