Ukrainadagi urush tufayli kuchaygan tabiiy gaz va neft taqchilligi mamlakatlarni yana eng iflos qazilma — ko‘mirga qaytishga majbur qilmoqda. Bu haqda Wall Street Journal xabar berdi.
AQSH, Yevropa va Xitoy kabi dunyoning yirik iqtisodiyotga ega mamlakatlari iqlim o‘zgarishiga qarshi kurashish uchun ko‘mir iste’molini kamaytirish bo‘yicha qaror qabul qilgan edi.
Endilikda ushbu davlatlar yetarli miqdorda elektr energiyasini ta’minlash uchun qisqa muddatli ko‘mir xaridlarini ko‘paytirmoqda.
Yangi ko‘mir konlari va resurslariga investitsiyalar qisqarganidan keyin uni ishlab chiqarish va sotish bo‘yicha raqobat deyarli yo‘qolgan edi. Bu yil esa narxlar yangi rekord darajaga chiqmoqda.
Osiyo uchun asosiy yetkazib beruvchi Avstraliyaning Nyukasl portidagi spot ko‘mir narxi o‘tgan oy birinchi marta bir tonna uchun 400 dollardan oshdi.
Rossiya Yevropa gaz yetkazib berishni to‘xtatgandan so‘ng, YI va uning zavodlarini energiya bilan ta’minlash uchun ko‘mir sotib olishda yetakchilik qilmoqda.
2030-yilgacha ko‘mirni energiya manbai sifatida ishlatishdan butunlay voz kechishga va’da bergan Germaniya endi ko‘proq import qiluvchi davlatlar qatoriga kirmoqda.
Hozirda ko‘proq ko‘mir iste’moli Rossiya yoqilg‘ilaridan ko‘ra yaxshiroq, — deydi energetika sektoriga ixtisoslashgan Vinson & Elkins LLP yuridik firmasining Londondagi hamkori Aleks Msimang.
AQSHning ba’zi shtatlari ko‘mir energiyasidan foydalanishni kuchaytirmoqda, chunki hozirgi anomal issiq haroratda elektr energiyasiga bo‘lgan yuqori talab mintaqaviy elektr tarmoqlarining to‘xtab qolishiga sabab bo‘lishi mumkin.
Dunyodagi eng yirik ko‘mir iste’molchisi Xitoy yoqilg‘i va undan elektr energiyasi ishlab chiqarishni kuchaytirmoqda, bu esa butun mamlakat bo‘ylab elektr energiyasi uzilishlariga sabab bo‘lishi haqidagi xavotirlarni kuchaytirmoqda.
Hindiston ham energiyaga bo‘lgan talab ortib borayotgani sababli ko‘mirga suyanmoqda. Xususan, aprel oyida mamlakatda ko‘mir ishlab chiqarish rekord darajada o‘sgan.
Xalqaro energetika agentligi (IEA)ning o‘tgan oy hisobotiga ko‘ra, Xitoy va Hindistonda mahalliy ko‘mir qazib olish 2021-yilda global investitsiyalar hajmini 10 foizga oshirishga yordam bergan.
IEA bu yil yana 10 foizga o‘sishni rejalashtirgan, chunki Xitoy va Hindiston global energiya tanqisligini bartaraf etishga harakat qilmoqda.
So‘nggi o‘n yil ichida ko‘plab yirik G‘arb mamlakatlarida ko‘mirdan foydalanish hajmi pasayib, uning o‘rnini toza energiya turlari egalladi.
Shamol va quyosh energiyasi kabi qayta tiklanadigan energiya manbalari narxlarning pasayishi, davlat subsidiyalari va mandatlari tufayli bozor ulushini qo‘lga kiritdi.
Shunday bo‘lsa-da, dunyoning ko‘p qismida tez o‘sib borayotgan energiya ehtiyojlari tufayli ko‘mirga global talab yana kuchaydi. IEA prognozlariga ko‘ra, bu yil talab rekord darajaga chiqadi.
Avvalroq Osiyoda ko‘mir narxi rekord darajada oshgani haqida xabar berilgan edi.
Izoh (0)