Аввалроқ Ўзбекистонда инфляция июнь ойида 0,9 фоиз бўлгани ҳақида хабар берилган эди. Йил бошидан буён инфляция 6,5 фоизни, йиллик нисбатда эса 12,2 фоизни ташкил этди.
Инфляция ҳар ой ва ҳар йил якунида ҳисобланади. Бу рақамлар ва фоизлар нима учун керак — буларнинг ҳаммаси ‘‘Дарйў’ шарҳида.
Инфляция — лотинча «inflatio» сўзидан олинган бўлиб, «шишиш», «бўртиш», «кўтарилиш» деган маъноларни англатиб, мамлакатдаги товар ва хизматлар баҳоси умумий даражасининг ошиши (ўсиши) тушунилади.
Нархларнинг умумий даражаси кўтарилиши натижасида мамлакат пул бирлиги (миллий валюта) харид қобилиятининг пасайиши рўй беради. Бу эса ўз навбатида, давлат пул бирлигининг қадрсизланишига олиб келади.
Пулнинг қадрсизланиши деганда нима тушунилади?
Пулнинг қадрсизланиши деганда, бир хил миқдордаги пулга вақти келиб камроқ бўлган товар ва хизматларни сотиб олиш тушунилади.
Мисол учун, йилнинг бошида 100 минг сўмга сотиб олиш мумкин бўлган кундалик истеъмолдаги товар ва хизматларнинг миқдори йилнинг охирига келиб камаяди.
Бу эса 100 минг сўмга йилнинг охирида йилнинг бошидагига нисбатан худди ўша товар ва хизматларни камроқ миқдорда сотиб олишни билдиради.
Инфляциянинг асосий кўрсаткичи истеъмол нархларининг маълум бир даврдаги ўзгариши ҳисобланади.
Ушбу умумий кўрсаткич истеъмол саватидаги ҳар бир товар ва хизмат учун нархларнинг ўзгаришини инобатга олган ҳолда ҳисобланади.
Узоқ вақт мобайнида товар ва хизматлар нархлари барқарор бўлган, ривожланган мамлакатларда инфляциянинг ўрта муддатли кўрсаткичи 2 фоиз атрофида бўлади.
Ушбу кўрсаткич ривожланаётган ва бозор иқтисодиёти шаклланаётган давлатлар учун эса нисбатан юқорироқ, тахминан 2-6 фоиз атрофида бўлиши мақбул деб топилган.
Мамлакат ичидаги товар ва хизматлар баҳосининг ўсиб боришига кўра инфляция турли даражаларда бўлади:
- Судралувчи (мўътадил) инфляция;
- Шиддатли (галлопинг) инфляция;
- Гиперфляция.
Судралувчи (мўътадил) инфляция — Узоқ вақт давомида барқарор ва паст даражада бўлган инфляция (замонавий иқтисодиёт учун йилига 1-4 фоиз нормал ҳисобланади).
Шиддатли (галлопинг) инфляция — Инфляцияни йиллик даражаси 10 фоиздан ошиб, ҳар ойда ўсиб боради.
Гиперфляция— Мамлакатда ўртача нарх-навонинг ҳаддан ташқари ошгандаги ҳолати бўлиб, ойига 50 фоиз, йилига эса 50 баравардан ҳам кўпроқ ошиши мумкин.
Бугунги кунда ҳар қандай даражадаги инфляция салбий жиҳатга эга деган фикр оммада мавжуд бўлиб, аслини олганда инфляциянинг ҳар қандай даражаси ҳам иқтисодиёт учун зарарли эмас. Иқтисодий ўсиш учун кам фоизли барқарор инфляция бу табиий жараён.
Паст даражадаги инфляция иқтисодиётда қўшимча талаб яратиши орқали иқтисодий ўсишга туртки беради. Инфляциянинг умуман йўқ бўлиши эса иқтисодиётнинг ўсиш суръатини пасайтириб юбориши мумкин.
Инфляцияни келиб чиқишига кўра икки тоифага ажратиш мумкин:
- талаб инфляцияси;
- таклиф инфляцияси.
Талаб инфляцияси — Инфляциянинг бу тури талабнинг кескин ошиши натижасида иқтисодиётда пул таклифининг ошишига ёки харидорлар томонидан инфляцион кутилмаларни шаклланишига олиб келади.
Соддароқ қилиб айтганда, ишлаб чиқариш соҳаси аҳолининг талабини тўла қондира олмайди, таклифга нисбатан талаб ошиб кетади. Натижада товар ва хизматлар нархлари ўсади.
Таклиф инфляцияси — инфляциянинг бу тури ишлаб чиқариш харажатларининг кескин ошиши натижасида содир бўлади.
Яъни, ҳар хил жараёнлар ва таркибий ўзгаришлар туфайли меҳнат унумдорлигининг пасайиши натижасида маҳсулот ишлаб чиқаришга кетган харажатлар ошади. Натижада ишлаб чиқариладиган товар ва хизматларнинг нархлари ошади.
Шиддатли инфляция келгусида юқори инфляцияга олиб келиб, иқтисодиётни издан чиқариб юбориш хавфи бор. Шу нуқтаи назардан паст даражадаги барқарор инфляция ижобий ҳисобланади.
Мақолада «Bankxizmati.uz» сайтининг маълумотидан фойдаланилган
Изоҳ (0)