«Ташқи кучлар Ўзбекистон ва Қозоғистон ўртасида келишмовчилик туғдириши мумкин». Turan Times бош муҳаррири Қорақалпоғистондаги намойишларга муносабат билдирди

Қозоғистоннинг Turan Times нашри бош муҳаррири Газиз Абишев Қорақалпоғистонда бўлаётган ҳодисалар ва унинг қозоқ жамоатчилиги орасидаги муҳокамаларига ўз муносабатини билдирди. Унинг фикрича, мазкур ҳолат оқибатида ташқи кучлар икки давлат ўртасида ихтилоф пайдо қилишга уриниши мумкин.

«Қорақалпоғистон воқеалари ортидан ташқи кучлар Ўзбекистон ва Қозоғистон ўртасида келишмовчилик туғдиришга ҳаракат қилиши мумкин. Худдики қозоқлар ўзларига яқин бўлган қорақалпоқлардан жуда хавотирда, шунингдек, Ўзбекистонни кучсизлантиришдан манфаатдор.

Тан олиш керак, оқ-қора фикрли, Қозоғистоннинг миллий давлат манфаати нима эканини тушунмайдиган қозоқ диван қаҳрамонларимиз бу оловга ўтин ташламоқда.

Остона ва Тошкент ўртасида юзага келиши мумкин бўлган жанжал «бўлиб ташлаб, ҳукмронлик қил» тамойилида иш кўрадиган, минтақада ўз таъсирини кучайтирмоқчи бўлган ташқи ўйинчилар учун, албатта, фойдали бўлади.

Лекин ҳозирда икки давлат ўртасида барча муҳим дипломатик даражаларда конструктив мулоқот олиб борилмоқда. Ўзбекистон Қозоғистон ҳар қандай вазиятда ҳам низоларни тинч йўл билан ҳал қилишга чақириб, пировардида қўшниларининг ҳудудий яхлитлиги тарафдори эканини яхши билади. Ва Ўзбекистон Республикасининг ҳозирги кўринишдаги суверенитетига қарши ҳеч қандай чора кўрилмайди», — деган у Telegram мессенжеридаги каналида.

Унинг таъкидлашича, ижтимоий тармоқларнинг қозоқ сегментида Қорақалпоғистондаги воқеалар ҳақида маълумот оладиган ўқувчи қуйидагиларни билиб олиши керак:

• Қозоғистоннинг ташқи сиёсати мамлакат президенти томонидан белгиланади ва фақат у ваколат берган шахслар томонидан ифодаланади;
• Қорақалпоғистон — Ўзбекистоннинг ички иши;
• Қозоғистон бошқа давлатларнинг ҳудудий яхлитлиги тамойилига амал қилади, хусусан, Ўзбекистоннинг тўлиқ суверенитети ва ҳудудий яхлитлигини қўллаб-қувватлайди;
• Қозоғистон Ўзбекистондаги референдумнинг ҳар қандай натижасини қўллаб-қувватлайди.

Эслатиб ўтамиз, Қорақалпоғистоннинг Нукус шаҳридаги конституцион ислоҳотлардан норози бўлган фуқароларнинг ноқонуний намойишлари бўлиб ўтди. Жўқорғи Кенгеснинг маълум қилишича, ахборот хуружлари ва рўй бераётган воқеаларни қасддан бузиб кўрсатиш орқали таъсир қилишга уринишлар қайд этилган.

2 июль куни Шавкат Мирзиёев Нукусга келиб, депутатлар, Қорақалпоғистон фахрийлари ва фаоллари билан учрашув ўтказди. Давлат раҳбари Конституциянинг Қорақалпоғистонга тегишли моддаларини амалдаги таҳрирда ўзгаришсиз қолдириш зарурлигини айтди. «Конституциявий қонун лойиҳаси референдумдан кейингина қонуний тусга киришини билдириб, фуқароларнинг хоҳиш-иродаси, таклиф ва фикрларидан келиб чиққан ҳолда, ушбу лойиҳа ўзгаришини ва такомилига етказилишини қайд этган.

Шавкат Мирзиёев фармони билан фуқароларнинг хавфсизлигини таъминлаш, уларнинг ҳуқуқ ва эркинликларини ҳимоя қилиш, қонунийлик ва ҳуқуқ-тартиботни тиклаш мақсадида Қорақалпоғистон Республикаси ҳудудида 2022 йил 3 июль куни соат 00:01 дан 2022 йил 2 август куни соат 00:00 га қадар бўлган даврда фавқулодда ҳолат жорий этилди.

Президент 3 июль, якшанба куни яна Нукусга учиб кетди. У ерда видеоселектор йиғилиши ўтказилиб, барча туманлар билан мулоқот қилинган. Туман ҳокимлари ва ҳуқуқни муҳофаза қилувчи органлар раҳбарлари фуқароларнинг хавфсизлигини таъминлаш, қонунийлик ва ҳуқуқ-тартиботни мустаҳкамлаш бўйича кўрилаётган чора-тадбирлар юзасидан ахборот берган. Қайд этилишича, давлат раҳбарининг мурожаатидан кейин вазият барқарорлашган, ҳаёт ўз маромига қайтмоқда.