Россияда 5 ёшли ўзбекистонлик бола 7-қаватдан йиқилиб ҳалок бўлди

Россиянинг Санкт-Петербург шаҳрида Ўзбекистон фуқароларининг 5 ёшли боласи еттинчи қаватдан тушиб кетди. Бу ҳақда «Fontanka.ru» хабар қилди.

Қайд этилишича, бола дераза токчасига чиқиб олиб, очиқ қолган ойнадан пастга тушиб кетган. Воқеа гувоҳлари ерда қонга беланиб ётган болани кўриб, тез ёрдам чақирган. Беш ёшли жабрланувчи баландликдан йиқилиш жароҳатлари билан касалхонага етказилган.

Ички ишлар вазирлиги боланинг ота-онаси — 23 ва 37 ёшли Ўзбекистон фуқароларини топиб, суҳбатлашган. Улар шу куни (Москва вақти билан) соат 8:00 да ишга кетиб, фарзандини уйда ёлғиз қолдирганини, вақти-вақти билан боладан телефон орқали хабар олиб турганини айтишган.

Шифокорларнинг уринишларига қарамай, бола касалхонада вафот этган.