Гавайидаги гипертовушли ракета прототипининг синови учиришдан кейин юзага келган муаммо туфайли муваффақиятсиз якунланди. Бу ҳақда АҚШ мудофаа вазирлиги ҳисоботига таяниб, Bloomberg хабар берди.
«Носозлик прототипда двигатель ёқилгандан кейин содир бўлди», — дея АҚШ ҳарбий-денгиз кучлари вакили Тим Гормандан иқтибос келтиради агентлик.
Унинг сўзларига кўра, синовлар Гавайида ўтказилган, у бошқа тафсилотларни келтирмаган.
Bloomberg’нинг ёзишича, бу ядросиз тезкор зарба бериш дастури доирасидаги иккинчи муваффақиятсиз синовдир.
Апрель ойида CNN манбаси Қўшма Штатлар март ойи ўрталарида гипертовушли ракетани муваффақиятли синовдан ўтказгани ҳақида маълум қилганди. Бироқ, АҚШ Россия билан зиддият кучайишига йўл қўймаслик учун синовларни сир сақлашга қарор қилган, деди манба.Телеканал маълумотларига кўра, синовлар Россия Украинада «Кинжал» гипертовушли ракетаси қўллангани ҳақида эълон қилганидан бир неча кун ўтиб амалга оширилган.
Шу билан бирга, март ойи бошида Пентагон Minuteman III қитъалараро баллистик ракетасини синовдан ўтказишни кейинга қолдирди ва кўп ўтмай бекор қилди. Режаларнинг ўзгартирилишига Москва билан муносабатларда зиддият юзага келиши хавфи ҳам сабаб бўлган, деб ёзади Wall Street Journal.
Изоҳ (0)