Путин Украинадаги махсус операциянинг туб мақсадини маълум қилди ва унинг муддати ҳақида гапирмасликни таклиф этди

Украинадаги Россия ҳарбий операциясининг якуний мақсади Донбассни озод қилиш ва Россиянинг ўзи учун хавфсизликни кафолатлаш ҳисобланади. Бу ҳақда мамлакат президенти Владимир Путин олтинчи Каспий саммитидан кейин айтиб ўтди, деб ёзади «РБК».

«Туб мақсадни мен белгилаб қўйганман — бу Донбассни озод этиш, бу одамларни ҳимоя қилиш ва Россиянинг ўз хавфсизлигини таъминлай оладиган шароитларни яратиш», — деди Путин.

Қўшинлар белгиланган марраларгача етиб боряпти, лекин операциянинг тугаш муддатлари ҳақида гапирмаса ҳам бўлади, ҳарбийларни жадаллаштириш — нотўғри, деди президент.

«Бу [махсус операциялар муддати] жанговар ҳаракатлар тезлигига боғлиқ, у эса бевосита эҳтимолий талафотларга бориб тақалади, биз аввало йигитларимиз ҳаётларини сақлаб қолиш ҳақида ўйлашимиз керак», — дея қўшиб қўйди у.

Шунингдек, давлат раҳбари қайд этишича, у махсус операцияни олиб бораётган ҳарбийларга ишонади. Унинг фикрича, улар қандай зарур деб ҳисобласа, шундай ҳаракат қилмоқда. «Мен, албатта, олий бош қўмондонман, бироқ Бош штаб академиясини битирмаганман. Мен профессионал бўлган одамларга ишонаман», — деди Путин.

24 февраль куни Путин ҳарбий операция ўтказилишини эълон қилганида унинг мақсади Украинани «демилитаризация ва денацификация қилиш» (қуролсизлантириш ва нацизмни йўқотиш), шунингдек, Донбасснинг тинч аҳолисини «геноцид»дан ҳимоя қилиш эканини айтганди.

Президент матбуот котиби Дмитрий Песков денацификация деганда нима назарда тутилаётганини тушунтириб, «Украинани озод қилиш ва уни нацистлар кайфиятидаги одамлардан тозалаш» зарурлигини айтганди. У, шунингдек, сўнгги вақтларда «анчагина» ўсган «ҳарбий потенциални нейтраллаштириш» заруриятини ҳам таъкидлаганди.

Май ойида Россия ташқи ишлар вазири Сергей Лавров махсус операциялар мақсади сифатида шарқий Украина ва Россия хавфсизлигини таъминлашни айтганди. У Россия томони Украинада ҳокимият алмашишини ёки президент Владимир Зеленский таслим бўлишини талаб қилмаслигини қайд этди. У Украинадаги махсус операция тезлиги «тинч фуқаролар ва россиялик ҳарбий хизматчилар учун ҳар қандай хавфларни минималлаштириш заруриятига» боғлиқлигини айтди.

G7 мамлакатлари саммитида сўзлаган нутқида Зеленский жанговар ҳаракатлар йил охиригача, қиш бошлангунича тугашини хоҳлашини айтди.