Россия президенти Владимир Путин Кременчугдаги савдо марказига ракета билан берилган зарба «разведка қилинган нишонларга» нисбатан амалга оширилганига ишонч билдирди, деб ёзади Meduza.
Ашхободда журналистларнинг саволларига жаво берар экан, Путин Украина ҳарбийлари техникани «турар жой даҳалари ва яна аллақаерларга» жойлаштиришини, шунингдек, «ҳар хил омборлар, бозорларга» яширишини, Россия ҳарбийлари эса шу объектларга зарбалар беришини, фуқароларни нишонга олмаслигини айтди.
«Бизда ҳеч ким шунчаки дуч келган жойларни ўққа тутиб кетавермайди… Одатда бу разведка қилинган, ўрганилган нишонларга нисбатан амалга оширилади… Ишончим комилки, бу ҳолатда ҳам худди шундай бўлган. Ахир улар Ғарб етказиб бераётган техникани ҳар хил омборларга, бозорларга, заводларга, цехларга яширмоқда, у ерда техника таъмирланади ёки худди шу чет эл билан узоқ давом этган кимўзардан кейин тартибга келтирилади. Россия армияси ҳеч қанақа фуқаролик объектларига зарба бераётгани йўқ», — деди Россия президенти.
Россия Полтава вилоятидаги Кременчуг шаҳрига 27 июнь куни ракета билан зарба берди. Оқибатда «Амстор» савдо марказининг бир қисми вайрон бўлиб, ёнғин бошланди, камида 20 киши ҳалок бўлиб, қарийб 60 киши жароҳатланди, яна 20 дан зиёд одам бедарак йўқолган деб ҳисобланилмоқда.
Россия Мудофаа вазирлиги Америка қурол-яроғлари сақланадиган омборга зарба берганини, гўёки «фаолият олиб бормаётган» савдо марказидаги ёнғинга эса ўқ-дориларнинг портлаб кетиши сабаб бўлганини маълум қилди.
Изоҳ (0)