Филиппин Қимматли қоғозлар бозори бўйича комиссияси Rappler нашрини ёпишни буюрди. Бу ҳақда нашр ҳаммуассиси ва раҳбари, тинчлик бўйича Нобель мукофоти лауреати Мария Ресса маълум қилди, деб хабар беради CNN Philippines.
Рессанинг қўшимча қилишича, Rappler фаолиятини тугатмоқчи эмас ва ҳокимият қарори устидан шикоят қилади.
Филиппин Қимматли қоғозлар бозори комиссияси Rappler’нинг рўйхатга олиш гувоҳномасини бекор қилиш тўғрисидаги 2018 йилдаги қарорини тасдиқлади. Бундай қарорга нашр 2015 йилда америкалик тадбиркор, eBay асосчиси Пер Омидяр компаниясидан сармоя олгани сабаб бўлган эди.
Филиппин қонунларига кўра, чет элликлар маҳаллий ОАВга эгалик қила олмайди. Аммо Rappler’нинг таъкидлашича, Қимматли қоғозлар бозори комиссияси 2015 йилда келишувни маъқуллаган, Омидяр эса нашр устидан назорат ўрнатмаган. Бундан ташқари, 2018 йилда келишув бўйича саволлар пайдо бўлгач, сармоядор сотиб олган Rappler қимматли қоғозларини нашр жамоасига ўтказган.
Rappler’ни ёпиш қарори Филиппин президенти Родриго Дутертенинг ваколат муддати тугашига бир кун қолганида қабул қилинди. 30 июнь куни Дутертенинг иттифоқчиси ва май ойида бўлиб ўтган сайловларда ғалаба қозонган кичик Фердинанд Маркос расман президент бўлади — у Филиппин диктатори Фердинанд Маркоснинг ўғли.
Rappler веб-сайти 2012 йилда ташкил этилган ва Филиппин ҳукумати сиёсатини, хусусан, Родриго Дутертенинг гиёҳванд моддаларга қарши эълон қилган урушини, унинг доирасида кўплаб суддан ташқари қатлларни танқид қилган. Филиппинда Мария Ресса интернетда туҳмат қилганликда айбланган.
2021 йилда Мария Ресса россиялик журналист ва «Новая газета» бош муҳаррири Дмитрий Муратов билан Тинчлик бўйича Нобель мукофотига сазовор бўлди. 2022 йил март ойида «Новая газета» Украина билан уруш бошланиши муносабати билан расмийларнинг босими туфайли ўз фаолиятини тўхтатди.
Июнь ойида Дмитрий Муратов Нобель медалини кимошди савдосида 103,5 миллион долларга сотди. Йиғилган маблағ ЮНИСЕФга украиналик болаларга ёрдам бериш учун ўтказилади.
Изоҳ (0)