Россия ташқи ишлар вазири ўринбосари Сергей Рябков 29 июнь куни АҚШнинг Европага қўшимча кучларини узоқ муддатга жойлаштириш ҳақидаги қарори Россия томонидан жавоб чораларига олиб келади, дея баёнот берди.
«Қўшма Штатлар ўтган йили эскалация сценарийсининг олдини олиш учун қонуний кучга эга бўлган келишувлар, хавфсизлик кафолатлари бўйича шартномалар тузиш бўйича таклифларимиз билан уларга берилган имкониятни қўлдан бой берди. Ҳозир содир бўлаётган нарса, албатта, биз томондан жавоб чораларига олиб келади», — дейди вазир ўринбосари Москвада журналистларга Вашингтоннинг тегишли қарорини шарҳлар экан.
«Менимча, бундай қарорни таклиф қилаётганлар Россияни қўрқитиш, қандайдир тарзда тийиб туриш мумкин, деган хаёлда — улар бунга эриша олмайди ва бу ҳаракатлардан уларга керакли натижа бўлмайди», — дея қўшимча қилган Рябков.
«Қўшимча кучлар пайдо бўладиган мамлакатлар хавфсизлиги мустаҳкамланмайди, барқарорлашув истиқболи узоқ, хавф-хатар кучаяди. Биз қарз билан қолиб кетмаймиз. Имконият ва ресурсларимиз бор, хавфсизлик юз фоиз кафолатланади», — дея таъкидлаган у.
Аввалроқ АҚШ президенти Жо Байден Вашингтон Европа давлатлари, жумладан, Буюк Британия, Испания, Польша ва Болтиқбўйи мамлакатларидаги ҳарбий иштирокини ошириш ниятида эканини айтган эди.
Изоҳ (0)