Банклардаги қонун бузилишларига нисбатан чоралар кўрилди — Марказий банк

Марказий банк банклардаги ижтимоий тармоқларда тарқалган истеъмолчилар ҳуқуқлари бузилиши бўйича ҳолатларга чоралар кўрилганини маълум қилди.

Маълум бўлишича, жорий йилнинг иккинчи чорагида, фуқаро М.Й. томонидан омонатга қўйилган пул маблағига фоизлар нотўғри ҳисобланган. Бундан ташқари фуқаро V.О.нинг омонатга қўйган пул маблағлари қайтариб берилмаган. 

«Ёз ифори» номли омонат шартларига кўра исталганча қўшимча маблағ киритиш имконияти мавжуд бўлса-да, фуқаро А.А. номига расмийлаштирилган омонатга қўшимча маблағ қабул қилинмаган. 

Фуқаро Д.Б. томонидан банк мобил иловаси орқали ўтказилган пул маблағи унинг омонат ҳисоб рақамига кирим бўлмаган. 

Кредитга кафил бўлган фуқаронинг маълумотлари нотўғри киритилгани сабабли мазкур кредитга алоқаси бўлмаган фуқаро М.Ғ.га кредит маблағини тўлаш бўйича банк томонидан талабнома юборилган. 

Шу ва бошқа қоидабузариклар тўғрисида ижтимоий тармоқларда хабарлар тарқалган.

Мазкур ҳолатлардан келиб чиқиб, «Капиталбанк», «Қишлоққурилишбанк», «Алоқабанк», «Халқ банки», «Ҳамкорбанк», «Ўзсаноатқурилишбанк», «Анорбанк», «Асакабанк» ва TBC банкларга 15 та кўрсатма хатлари юборилди. 

Хатларда хабарларда кўтарилган масалаларни ўрганиб, ўзларининг расмий коммуникация каналлари орқали муносабат билдириши айтилган.

Кўрсатмаларга асосан банклар томонидан хабарлар ўрганиб чиқилди ва аниқланган камчиликлар бартараф этилиб, расмий саҳифалари ва сайтлари орқали истеъмолчиларга тегишли тушунтиришлар берилди.