Banklardagi qonun buzilishlariga nisbatan choralar ko‘rildi — Markaziy bank

Markaziy bank banklardagi ijtimoiy tarmoqlarda tarqalgan iste’molchilar huquqlari buzilishi bo‘yicha holatlarga choralar ko‘rilganini ma’lum qildi.

Ma’lum bo‘lishicha, joriy yilning ikkinchi choragida, fuqaro M.Y. tomonidan omonatga qo‘yilgan pul mablag‘iga foizlar noto‘g‘ri hisoblangan. Bundan tashqari fuqaro V.O.ning omonatga qo‘ygan pul mablag‘lari qaytarib berilmagan. 

“Yoz ifori” nomli omonat shartlariga ko‘ra istalgancha qo‘shimcha mablag‘ kiritish imkoniyati mavjud bo‘lsa-da, fuqaro A.A. nomiga rasmiylashtirilgan omonatga qo‘shimcha mablag‘ qabul qilinmagan. 

Fuqaro D.B. tomonidan bank mobil ilovasi orqali o‘tkazilgan pul mablag‘i uning omonat hisob raqamiga kirim bo‘lmagan. 

Kreditga kafil bo‘lgan fuqaroning ma’lumotlari noto‘g‘ri kiritilgani sababli mazkur kreditga aloqasi bo‘lmagan fuqaro M.G‘.ga kredit mablag‘ini to‘lash bo‘yicha bank tomonidan talabnoma yuborilgan. 

Shu va boshqa qoidabuzariklar to‘g‘risida ijtimoiy tarmoqlarda xabarlar tarqalgan.

Mazkur holatlardan kelib chiqib, “Kapitalbank”, “Qishloqqurilishbank”, “Aloqabank”, “Xalq banki”, “Hamkorbank”, “O‘zsanoatqurilishbank”, “Anorbank”, “Asakabank” va TBC banklarga 15 ta ko‘rsatma xatlari yuborildi. 

Xatlarda xabarlarda ko‘tarilgan masalalarni o‘rganib, o‘zlarining rasmiy kommunikatsiya kanallari orqali munosabat bildirishi aytilgan.

Ko‘rsatmalarga asosan banklar tomonidan xabarlar o‘rganib chiqildi va aniqlangan kamchiliklar bartaraf etilib, rasmiy sahifalari va saytlari orqali iste’molchilarga tegishli tushuntirishlar berildi.