Марказий банкнинг Finlit лойиҳаси томонидан микроқарз олиш тартиби ҳақида қўлланма ишлаб чиқилди.
Микроқарз банклар ва микрокредит ташкилотлари томонидан тўловлилик, муддатлилик ва қайтариш шартлари асосида фақат жисмоний шахсларга берилади.
Унинг миқдори қарз олувчининг тўлов қобилиятига боғлиқ бўлиб, 50 млн сўмдан ошиб кета олмайди.
Микроқарз Ўзбекистон миллий валютасида нақд ёки банк картасига надқ пулсиз кўринишда ўтказилади. Банк картаси эса дебет ёки кредит картаси бўлиши мумкин.
Дебет карта – товар ва хизматларга ҳақ тўлаш, ўтказмаларни амалга ошириш ва банкоматдан нақд пул ечиш имкониятини берувчи картадир.
Кредит карта - товар ва хизматларга ҳақ тўлаш учун, мижозга банк билан тузилган шартнома тарифларига кўра тақдим қилинган банк маблағлари ҳисобига тўловларни амалга ошириш имкониятини берувчи картадир.
Нақд пулсиз шаклда олинган микроқарз, банк картасидан фойдаланиш орқали товар, иш ва хизматлар учун тўлаш имконини беради.
Шу билан бирга, банк томонидан банк картасига маблағларни ўтказиш орқали бериладиган микроқарз ҳар бир киши учун унинг ўртача ойлик даромади, кредит тарихи, ва бошқа омиллар асосида алоҳида ҳисобланиб банк томонидан белгиланган лимит доирасида берилади.
Бунда фоизлар рухсат этилган лимит эмас, фақат ҳақиқатда ишлатилган маблағлар бўйича ҳисобланиб, қарзнинг ўз вақтида қайтарилиши кредит хизматини қайта тиклаш имконини беради.
Шу билан бирга, микроқарзнинг лимити дебет картаси учун овердрафт шаклида очилиши мумкин, бу унинг эгасига ўз ва қарз маблағларини ишлатиш имконини беради.
Овердрафт — бу банкдан қисқа муддатга кичик суммани қарзга олиш имконияти. Агар овердрафт уланган бўлса, ҳисобда мавжуд бўлган пуллардан кўпроқ пул ишлатиш мумкин.
Шу билан бирга, овердрафт банклар томонидан чиқарилган дебет карталарига асосан иш ҳақини тўлаш ёки пенсияни ўтказиб бериш учун берилади.
Дебет картасига маблағларни ўтказиш йўли билан берилган микроқарзнинг сўндирилиши автоматик тарзда содир бўлади. Кредит картаси берилганда, қарз олувчи кредитни сўндириши учун ҳисобга кредит шартномасида белгиланган тўлов миқдорини ўз вақтида киритиши шарт.
Микроқарзни қандай олиш мумкин?
Биринчидан, қулай шартларда микроқарзни тақдим этувчи банк ёки микрокредит ташкилотини танлаш керак.
Микроқарз бериш шартлари ҳақида маълумот билан банклар ва микрокредит ташкилотларининг расмий веб-сайтлари ёки уларнинг офисларига бориш орқали танишиб чиқиш мумкин.
Керакли ҳужжатлар
- микроқарз олиш учун ариза;
- шахсни тасдиқловчи ҳужжат;
- фаолият ва даромад ҳақида маълумотларни ўз ичига олган ҳужжатлар.
Микроқарз бўйича таъминот учинчи шахс кафиллиги, суғурта полиси, ликвидликка эга бўлган мол-мулк гарови ва бошқалар бўлиши мумкин.
Микроқарз берувчи ташкилот аризани олгандан сўнг уч иш куни ичида уни кўриб чиқиши ва қарор қабул қилиши шарт.
Микроқарз бериш тўғрисида ижобий қарор қабул қилинишига ижобий кредит тарихи, доимий даромад манбаининг мавжудлиги ва керакли ҳужжатларни тўлиқ тақдим этиш таъсир қилади.
Баъзи банкларнинг мобил иловалари масофадан туриб микроқарз олиш имконини беради.
Аввалроқ кредит тарихи нима ва у қанчалик муҳимлиги ҳақида хабар берилганди.
Изоҳ (0)