АҚШ Молия вазирлиги Россияга қарши янги санкциялар пакетини эълон қилди. Унда мамлакатга Россия олтинини олиб киришни тақиқлаш ҳам жой олган. Истисно тариқасида «қонун билан назарда тутилган» ҳолатлар ва OFAC — Чет эл активларини назорат қилиш идорасининг бошқа рухсатномалари кўрсатилган.
АҚШ Ғазначилигининг аниқлик киритишича, янги чеклов шу кунгача Россия Федерациясидан ташқарида бўлган рус олтинга тааллуқли эмас.
Катта еттилик саммитида эълон қилинганидек, АҚШ Россия олтинига қарши, олдинроқ Буюк Британия, Канада ва Япония томонидан қўллаб-қувватланган санкцияларга қўшилди. Янги тақиқ жорий этилишидан олдин ҳам Россия олтини билан боғлиқ баъзи операциялар чекланган эди.
OFAC АҚШ фуқароларини ҳушёр бўлиш ва олтин билан боғлиқ операцияларда билан янги қоидаларни четлаб ўтишга уринмаслик ҳақида огоҳлантирди.
Россиянинг бир қатор компаниялари ҳам АҚШ санкциялари остида қолди, масалан, «КамАЗ», «Туполев», «ОАК», «Иркут» ва «Ростех». Вашингтон россиялик телебошловчи Тина Канделаки, Россиянинг собиқ мудофаа вазири Анатолий Сердюков ва унинг оила аъзоларига нисбатан ҳам шахсий санкциялар киритди. Ҳаммаси бўлиб, санкциялар рўйхатига 45 компания ва 29 жисмоний шахс киритилган.
Ўтган ҳафта Европа Кенгаши раҳбари Чарльз Мишел Европа Иттифоқи Россия олтини импортига эмбарго қўйиш имкониятини кўриб чиқишга тайёрлигини айтганди. Тақиқ янги олтин партияларига таъсир қилади ва аллақачон сотиб олинган партияларга таъсир қилмайди.
Изоҳ (0)